‘जादु चलाउन चाहे चल्छ, तर चलाउने पक्षमा छैनौं’

सेतोमसी
बैशाख २२, २०८२ सोमवार

‘जादु चलाउन चाहे चल्छ, तर चलाउने पक्षमा छैनौं’

अ +
अ
अ -

काठमाडौं । नेकपा (माओवादी केन्द्र)का अध्यक्ष पुष्पकमल दाहाल प्रचण्डले हाल सरकार निर्माणमा आफूहरू संलग्न नभएको बताएका छन् । आफुहरु जनतामै जान चाहेको उल्लेख गर्दै उनले सोमवार भनेका छन्, 'जादु चलाउन चाहे त चल्छ, तर अहिले हामी चलाउने पक्षमा छैनौं।'

संसद भवन परिसरमा सोमबार सञ्चारकर्मीहरूसँग कुरा गर्दै अध्यक्ष प्रचण्डले वर्तमान सरकारले अगामी आर्थिक वर्षका लागि प्रस्तुत गरेको नीति तथा कार्यक्रम जनभावनाअनुसार नभई औपचारिकता पूरा गर्न मात्र ल्याइएको आरोप लगाए। उनका अनुसार सरकारले न जनताको भावना बुझेको छ, न राष्ट्रको आवश्यकता पहिचान गरेर सृजनात्मक र परिणाममुखी कार्यक्रम ल्याउन सकेको छ।

प्रचण्डले आफूले देशका विभिन्न भागमा जनतासँग संवाद गरेर उठाइएका प्राथमिकतालाई नीति तथा कार्यक्रममा प्रस्तुत धारणा बनाएको दाबी गरे। उनले भने, “हामीले पूर्वदेखि पश्चिमसम्म जनतासँग जे संवाद गरियो र जनभावना जे बुझे, मैले त्यसैको आधारमा संसदमा आफ्नो विचार राखेको हुँ।”

उनको भनाइमा, सरकारले प्रस्तुत गरेको नीति तथा कार्यक्रम सिर्जनात्मक र जनपक्षीय नभएर गत वर्षका कार्यक्रमहरूसमेत कपिपेस्ट गरिएको महसुस हुन्छ। “गत वर्षको नीति तथा कार्यक्रम कपिपेस्ट गर्नु भनेको झारा टार्नु हो,” भन्दै उनले औपचारिकता पूर्तिका लागि मात्र ल्याइएको दस्तावेजको आलोचना गरे।

फरक प्रसंगमा उनले अहिले आफ्नो ध्यान सत्ताको समीकरणभन्दा बाहिर रहेको भन्दै छिट्टै मध्यपहाडी लोकमार्ग अभियानमार्फत जनतामाझ पुग्ने जानकारी दिए। उनले भने, 'हाम्रो ध्यान सरकार बनाउनेतिर होइन, जनतामै हो।'