देवदह । नेकपा (एकीकृत समाजवादी) ले देवदहमा आधारभूत समस्या पहिचानको लागि सुझाब संकलन गरेको छ । मंगलबार आयोजित कार्यक्रममा विभिन्न क्षेत्रबाट सहभागीहरुले सुझाव दिएको पार्टी नगर अध्यक्ष सुशिला भट्टराईले जानकारी दिइन् ।

कार्यक्रममा बोल्दै पार्टीका केन्द्रिय सदस्य सिद्धिचरण भट्टराईले आम असन्तुष्टलाई सम्बोधन गर्दै सृजनात्मक ढंगले समस्या हल गर्ने उद्धेश्यले समस्या पहिचान गरी सुझाव संकलन गरेर नगरपालिकालाई बुझाउने कार्यक्रम तय गरिएको बताए । 
 
अहिलेको मुख्य समस्या बेरोजगारी र कुशासन रहेको उल्लेख गर्दै उनले यिनै समस्याको निकासको लागि एकीकृत समाजवादीले केन्द्र, प्रदेश र स्थानीय तहमा नागरिकसंग सुझाब संकलन गरी सरकार प्रमुखलाई ज्ञापन पत्र बुझाउने अभियान संचालन गरेको बताए । 
 
कार्यक्रममा बोल्दै साना किसान सहकारी संस्थाकी अध्यक्ष टिका न्यौपानेले सहकारीहरुलाई स्थानीय तहले आवश्यक नीति बनाएर काम गर्नुपर्ने बताइन् । आदिवासी जनजाती महासंघ देवदह अध्यक्षसमेत रहेकी महिला स्वयंसेविका मिना श्रेष्ठले स्वास्थ्य स्वयंसेविकाको भरणपोषणको बारेमा स्थानीय तह चिन्तित हुनुपर्ने विचार राखिन् । उनले स्वास्थ्य क्षेत्रको जग बलियो बनाउन जनसमुदायसंग एकाकार भएर काम गर्ने स्वास्थ्य स्वयंसेविकाहरु आफ्नो पेशागत सुरक्षा र भविष्यको बारेमा चिन्तित रहेको बताइन् । 

पल्लवी सहकारी संस्थाका अध्यक्ष समेत रहेका अभियन्ता प्रमोद खनालले नगरपालिकाले ठुला योजनामा लगानी गर्नुपर्ने बताए । २-४ लाखका टुक्रे योजनाले दिगो विकास हुन नसक्ने उल्लेख गर्दै खनालले एउटा वडामा एउटा ठूलो योजना कार्यान्वयनमा ल्याउन सकियो भने त्यसले देखिने गरि विकास हुने बताए ।

व्यवसायी चन्द्रकान्त न्यौपानेले घरको मापदण्ड बारे नगरपालिकाले गलत निर्णय लिएको बताए । 'आज हामीले बनाएका साना घर, टिनले छाएका घर र साना झुपडीलाई हाम्रो सरकारको मापदण्डले घर नै मान्दैन ।' उनले भने, 'सरकारले बनाएको मापदण्ड अनुसार घर बनाउँदा ४०-५० लाख घटी घर बनाउने कुरा कल्पना पनि गर्न सकिदैन । त्यसैले नागरिकलाई बेघर बनाउन पाइन्न । निश्चित शहरी क्षेत्रमा बाहेक अन्यत्र सरकारी मापदण्ड जबर्जस्ती लाद्नु हुँदैन ।'

त्यसैगरी देवदह प्रेस क्लबका अध्यक्ष विष्णु पोखरेलले नगरपालिकाले आफ्नो स्रोत पहिचान र परिचालन गर्न नसकेको बताए । "नगरको मुख्य स्रोत नदिजन्य पदार्थ मात्र मानिदै आएको छ । अब यसलाई विस्तार गरिनुपर्छ ।"  उनले भने, "यहाँका सामुदायिक वनको स्रोत कसरी परिचालन गर्ने, टोलविकास संस्था, आमा समूह, सहकारी र अन्य संघसंस्थालाई कसरी परिचालन गर्ने भन्नेबारे नगरपालिकाको नीति हुनुपर्छ ।  त्यसो भयो भने, स्थानीय स्तरबाटै विकास अगाडी बढ्छ र त्यो दिगो पनि हुन्छ ।"

पार्टीका जिल्ला सचिव टंक पोखरेलले प्राप्त सुझावलाई दस्तावेजीकरण गर्ने र नगरपालिकामा बुझाउने बताए । उनले विभिन्न चरणमा सुझाब लिने कार्य जारी रहको बताए ।