बजेट समिक्षा

बजेटले दलाल पुँजीवादलाई प्रोत्साहित गरेको छ : नारायणकाजी श्रेष्ठ

सेतोमसी
जेठ २१, २०८२ बुधवार

बजेटले दलाल पुँजीवादलाई प्रोत्साहित गरेको छ : नारायणकाजी श्रेष्ठ

अ +
अ
अ -

काठमाडौँ । नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठले बजेटले दलाल पुँजीवादलाई प्रोत्साहित गरेको टिप्पणी गरेका छन् ।

राष्ट्रिय सभामा आर्थिक बर्ष २०८२ ÷०८३ को बजेटमाथिको छलफलमा भाग लिदै श्रेष्ठले बजेटले राष्ट्रिय पुँजीको निर्माण गर्ने र संबिधानको भावनालाई आत्मसाथ गर्न नसकेको टिप्पणी गरेका हुन् ।

उनले अहिले देशमा उत्पादन बढेर नभएर माग संकुचन भएर, आर्थिक शिथिलता बढेर निर्यात बढेको जस्तो देखिएको बताएका छन् ।

श्रेष्ठले बजेटले आर्थिक वृद्धिमा योगदान गर्न नसक्ने दाबि गर्दै भने– ‘बजेटले ६ प्रतिशत आर्थिक वृद्धिको कुरा गरेको छ । यो बजेट विन्यासको अवस्था हेर्दा ६ प्रतिशत आर्थिक वृद्धि हुने कुनै पनि अवस्थामा हुन सक्दैन । यो ४।५ प्रतिशतको आर्थिक वृद्धिको वरिपरी हुने देखिन्छ । त्यो भन्दा माथि जादैन ।’

श्रेष्ठले अहिले सुशासन, उत्पादन, लगानी, रोजगारी र स्रोतको व्यवस्थापन, पुँजीगत खर्च बढाउने नीति आवश्यक रहे पनि बजेटले त्यसलाई सम्बोधन गर्न नसकेको बताए ।

स्टार्टअपलाई प्रोत्साहन गर्ने र अन्य केहि ससाना प्रयासले अहिले आर्थिक रुपमा फड्को मार्न नसकिने बताउदै उनले बजेटमा पुँजीगत खर्च बढाउने योजना नै नआएको बताए ।

श्रेष्ठले खराब कर्जा र जग्गाको मौद्रिकरणले देशको आर्थिक अवस्था बिग्रिएको बताउदै सरकारको ध्यानाकर्षण गराएका छन् ।