भित्री भवनको सम्पत्ति करबारे काठमाडौँ महानगरले मालपोतसँग छलफल गर्ने

सेतोमसी
श्रावण २०, २०८३ बुधवार

भित्री भवनको सम्पत्ति करबारे काठमाडौँ महानगरले मालपोतसँग छलफल गर्ने

अ +
अ
अ -

काठमाडौँ । काठमाडौँ महानगरपालिकाले मुख्य सडकलाई आधार मानेर भित्री भवनको सम्पत्ति कर निर्धारण गर्दा करदातालाई परेको समस्याबारे मालपोत कार्यालयसँग समन्वय बैठक गर्ने निर्णय गरेको छ ।

महानगरको ५५औँ कार्यपालिका बैठकमा कार्यवाहक प्रमुख सुनिता डंगोलले मालपोतसँगको छलफलबाट समाधान नभए विधायन समिति, राजस्व समिति र सहरी योजना आयोगले संयुक्त अध्ययन गरी उपाय खोज्ने बताए । उनले पर्याप्त अध्ययनबिनै राजस्व दर हेरफेर नगरिएको र अघिल्लो दररेट नै कायम राखिएको स्पष्ट पारेकी थिइन् ।

बैठकले सहरी योजना आयोगका सदस्यमा आर्किटेक्ट बाबुराम भट्टराई, डा. सुरजराज काफ्ले, सरस्वती मानन्धर, प्रसुनरत्न बज्राचार्य, सुरज डंगोल, पुरुषोत्तम महत र दामोदर गिरीको नियुक्ति अनुमोदन गरेको छ। साथै नगर प्रहरीमा बढुवा, करार सेवाका कर्मचारीको म्याद थप तथा महिला तथा बालबालिका महाशाखा प्रमुख जानकी सिंहलाई बाल कल्याण अधिकारी तोक्ने निर्णय पनि गरिएको छ।

यस्तै बैठकले बाइक एम्बुलेन्स सञ्चालन गर्ने, काठमाडौँ चलचित्र महोत्सवको कार्ययोजना र अनुमानित बजेट स्वीकृत गर्ने निर्णय गरेको छ। भूमि समस्या समाधान समितिको पत्रबारे पनि विस्तृत छलफल गर्दै अव्यवस्थित बसोबासी, स्ववासी तथा बेनिस्साका जमिन व्यवस्थापनका विषयमा आगामी प्रक्रिया अघि बढाउने विषयमा छलफल गरिएको थियो।