बिर्तामोडको बडी ग्यारेजमा आगलागी हुँदा एक जनाको जलेर मृत्यु

सेतोमसी
कार्तिक ६, २०८३ बिहिवार

बिर्तामोडको बडी ग्यारेजमा आगलागी हुँदा एक जनाको जलेर मृत्यु

अ +
अ
अ -

झापा । झापाको बिर्तामोड नगरपालिका–२ रामचोकस्थित बडी ग्यारेजको क्यान्टिनमा आगलागी हुँदा एक जनाको जलेर मृत्यु भएको छ ।

बिहीबार बिहान करिब ४: १० बजे विद्युत् सर्ट भएर आगलागी हुँदा गौरीगञ्ज गाउँपालिका–२ निवासी ६५ वर्षीय रुद्रबहादुर तामाङको मृत्यु भएको हो । उनी उक्त क्यान्टिनमा काम गर्दै आएका थिए ।

ध्रुव भट्टराईको जग्गामा रहेको टिनको छानो भएको घरमा रवि राजवंशीले सञ्चालन गरेको ग्यारेजको क्यान्टिनमा आगलागी भएको प्रहरीले जनाएको छ । दमकल र स्थानीयवासीको सहयोगमा बिहान करिब ४: ३० बजे आगो नियन्त्रणमा लिइएको थियो ।

आगलागीबाट क्यान्टिनमा रहेका भाँडाकुँडा, लत्ताकपडा, तीनवटा खसीबाख्रा र एक लाख रुपैयाँ नगद जलेर नष्ट भएका छन् । प्रारम्भिक विवरणअनुसार क्यान्टिनमा करिब तीन लाख रुपैयाँ बराबरको क्षति भएको छ ।

ग्यारेजसँगै जोडिएको राजेन्द्र अग्रवालले सञ्चालन गरेको मार्बल तथा टायल्सको गोदाममा समेत सामान्य आगलागी भएको थियो ।

घटनामा भएको थप क्षतिको विवरण संकलन भइरहेको र आगलागीबारे अनुसन्धान जारी रहेको प्रहरीले जनाएको छ ।