देवदह । देवदह नगरपालिकास्थित पल्लवी बचत तथा ऋण सहकारी संस्थाले खैरेनी सेवा केन्द्रको सुरूवात गरेको छ । बुधबार रक्तदान कार्यक्रम सहित संस्थाको स्थापना दिवसको अवसरमा सहकारीले नयाँ सेवा केन्द्रको सुरुवात गरेको हो । 

नयाँ सेवा केन्द्र उद्घाटनको अवसरमा आयोजित रक्तदान कार्यक्रममा १०१ पिन्ट रगत संकलन भएको र त्यसमध्ये ३१ जना रक्तदाताले पहिलोपटक रक्तदान गरेको संस्थाका कार्यक्रम संयोजक पवन पौडेलले जानकारी दिए ।

रक्तदान कार्यक्रम तथा सहकारीको नयाँ सेवा केन्द्रको उद्घाटन गर्दै देवदह नगरपालिकाका नगर परमुख ध्रुवप्रसाद खरेलले देवदह रक्त संकलनको हब बन्न सक्ने बताए । नगरपालिकाभित्रका संघसंस्थाहरूले गरिरहने रक्तदान कार्यक्रम र त्यहाँबाट संकलित रगतको परिणाम हेर्दा देवदह रक्तदाताहरूको नगर जस्तो देखिएको उनले बताए । पल्लवी सहकारीले सहकारीका मूल्य मान्यता बमोजिम आफ्ना गतिविधि संचालन गरेको उल्लेख गर्दै उनले नयाँ सेवा केन्द्र संचालनले सहकारीको सेवा प्रवाह थप सहज हुने बताए । 

नेपाल स्वयंसेवी रक्तदाता समाजका केन्द्रिय महासचिव तथा रक्तदान अभियन्ता कृष्ण बहादुर चौहानले रूपन्देही रक्तदान र रक्त संकलनमा अघि रहेको उल्लेख गर्दै त्यसमा देवदहका संघसंस्थाले गरेको योगदानको चर्चा गरे ।  

कार्यक्रममा सहकारीका अध्यक्ष प्रमोद खनाल, कोषाध्यक्ष जगन्नाथ अधिकारी, सल्लाहकार पवन पौडेल, व्यवस्थापक केशब आचार्य लगायतले बोलेका थिए ।

२०६८ सालमा दर्ता भएर संचालनमा आएको पल्लवी सहकारीले यसअघि चरंगे, भवानीपुर र ६ नं मा सेवा केन्द्र संचालन गर्दै आएको छ । सहकारीको चौथों सेवा केन्द्रको रूपमा खैरेनीबाट कारोबार गरिएको संस्थाका अध्यक्ष प्रमोद खनालले बताए ।