एमाले छोडेर एकीकृत समाजवादी रोज्नेको संख्या बढ्दै, मंगलबार मात्रै तीन सांसद थपिए

सेतोमसी
भाद्र ८, २०७८ मंगलवार

एमाले छोडेर एकीकृत समाजवादी रोज्नेको संख्या बढ्दै, मंगलबार मात्रै तीन सांसद थपिए

फाइल फोटो

अ +
अ
अ -

काठमाडौँ । नेपाल कम्युनिस्ट पार्टी (एमाले) बाट बिद्रोह गरेर नेपाल कम्युनिस्ट पार्टी (एकीकृत समाजवादी) गठन गरेका नेता माधव कुमार नेपालको पक्षमा खुल्ने एमाले नेताहरू संख्या दिनानुदिन बढ्दै गएको छ । मंगलबार मात्रै एमालेका तीन जना संघीय संसदका सांसद र एक केन्द्रीय सदस्य एकीकृत समाजवादीको पक्षमा उभिएका छन्।

बुधबार एमाले विभाजन भएर बन्न लागेको एकीकृत समाजवादीको पक्षमा उभिन प्रतिनिधिसभा सदस्यहरु सोमप्रसाद पाण्डे, माया ज्ञवाली र राष्ट्रियसभाका सदस्य सारदादेवी भट्ट निर्वाचन आयोग पुगेर निवेदन दिएका हुन्।

सरकारले केन्द्रीय सदस्य वा संघीय संसदका २० प्रतिशत सदस्यले दल विभाजन गर्न पाउने गरी अध्यादेश ल्याएपछि भदौ २ गते माधव नेपालले एमाले विभाजन गरेर एकीकृत समाजवादी गठनका लागि आयोगमा निवेदन दिएका छन्।

उक्त निवेदनको पक्षमा सनाखत गराउन आयोगले बुधबार बोलाएको छ। पाण्डे, ज्ञवाली र भट्टले सनाखतमा सहभागी हुन पाउँ भनी निवेदन दिएको आयोगका सचिव सुरेश अधिकारीले जानकारी दिए।

त्यस्तै २ गतेको निवेदनमा सहभागी नभएका केन्द्रीय सदस्य राजन राईले पनि एकीकृत समाजवादीको पक्षमा सनाखत गर्न निवेदन दिएका छन्। यसअघि एकीकृत पार्टीको पक्षमा ५८ जना केन्द्रीय सदस्य र ३१ जना सांसदले आवेशन दिएका थिए।