देवदह । देवदह नगरपालिका वडा नं ११ मा आधारभूत स्वास्थ्य सेवा केन्द्रको उद्घाटन गरिएको छ । आइतबार एक कार्यक्रम बीच देवदह नगरप्रमुख ध्रुवप्रसाद खरेल र उपप्रमुख विद्यालक्ष्मी गुरुङ्गले आधारभुत स्वास्थ्य सेवा केन्द्र सहदौनियाको उद्घाटन गरे । 

कार्यक्रमम बोल्दै नगरप्रमुख खरेलले नगरपालिकाले स्वास्थ्य र शिक्षा क्षेत्रलाई महत्व दिएर काम गरिरहेको बताए ।  देवदह नगर अस्पताल उद्घाटनदेखि स्वास्थ्य विमाको प्रथम बिन्दु नगर अस्पताललाई बनाउनेसम्मको काम यहाँको स्वास्थ्य क्षेत्रको महत्वपूर्ण कार्य भएको उनले बताए । 

त्यसैगरी स्थानीय विद्यालाहरूमा दरबन्दी मिलान लगायतका कामसहित शिक्षाको गुणस्तर वृद्धिमा नगरपालिकाले काम गरिरहेको उनको भनाई छ । 

कार्यक्रममा बोल्दै नगर उपप्रमुख विद्यालक्ष्मी गुरुङले स्वास्थ्य मानवजीवनको पहिलो आवश्यकता भएको बताइन् । नागरिक स्वस्थ भएमात्र राज्य स्वस्थ हुने र समग्र प्रणाली व्यवस्थित हुने भएकोले नगरपालिकाले नगरबासीको स्वास्थ्य र स्वस्थ जीवनको लागि काम गरिरहेको उनले बताइन् ।

देवदह नगरपालिका वडा नं ११ का अध्यक्ष दुधनाथ यादवले स्वास्थ्य सेवा केन्द्र सुरु भएपछि देवदहको तल्लो क्षेत्रका नागरिकमा स्वास्थ्य सेवाको पहुँच हुने बताए । भवन निर्माण कार्यदेखि यसको सुरुवातसम्म वडा कार्यालयले निरन्तर संघर्ष गरिरहेको उनको भनाइ छ । 

वडा नं ११ मा विधिवत स्वास्थ्य सेवा केन्द्र सुरुवात  भएसंगै नगरपालिकाका १२ वटै वडामा स्वास्थ्य सेवा केन्द्र  संचालन भएको नगरपालिकाका स्वास्थ्य शाखा प्रमुख काशिनाथ बन्जाडेले जानकारी दिए ।  

यसअघि वडा अध्यक्ष अमर बहादुर चौधरी रहेको अवस्थामा वडाको कुन क्षेत्रमा स्वास्थ्य सेवा केन्द्र बनाउने भन्ने विवाद भएपछि लामो समय निर्माण हुन सकेको थिएन । स्वास्थ्य चौकीको भवन गतसाल निर्माण भएर जेठ २४ देखि संचालनमा रहेको भएपनि आइतबार विधिवत सुरुवात गरिएको वडा अध्यक्ष दुधनाथ कुँवरले बताए । 

स्वास्थ्य सेवा केन्द्रमा हाल दुई जना कर्मचारी कार्यरत छन् । जसबाट वडा नं ११ र १२ का नागरिक लाभान्वित हुने छन् । जेठ २४ बाट हालसम्म एक हजार ८०० जनाले सेवा लिएको वडा कार्यालयले जनाएको छ ।