रवि लामिछानेविरुद्धको मुद्दामा आजको थुनछेक बहस सुरु

सेतोमसी
माघ ११, २०८१ शुक्रवार

रवि लामिछानेविरुद्धको मुद्दामा आजको थुनछेक बहस सुरु

फाइल फोटो

अ +
अ
अ -

काठमाडौं । बुटवलको सुप्रिम बचत तथा ऋण सहकारी प्रकरणमा राष्ट्रिय स्वतन्त्र पार्टीका सभापति एवं पूर्वगृहमन्त्री रवि लामिछानेविरुद्धको मुद्दामा आजको थुनछेक बहस सुरु भएको छ ।

न्यायाधीश प्रह्लाद कुमार योगी इजलासमा सहकारी पीडिततर्फका वकिलले बहस सुरु गरेको अदालतले जनाएको छ ।

शुक्रबार सहकारी पीडितका तर्फबाट २ जना कानुन व्यवसायीले बहस गर्ने तयारी छ भने प्रतिवादीका तर्फबाट करिब आधा दर्जन कानुन व्यवसायीले बहस गर्ने बताएका छन् ।

आज जाहेरीकर्ताको तर्फबाट वरिष्ठ अधिवक्ता सुरेन्द्र भण्डारी र अधिवक्ता आर्सी गौतमले बहस गर्नेछन् । त्यसपछि प्रतिवादीका तर्फबाट बहस सुरु हुने छ ।

रवि लामिछानेका तर्फबाट वरिष्ठ अधिवक्ता तथा पूर्वमहान्यायाधिवक्ताहरु सुशिलकुमार पन्त र रमन श्रेष्ठ तथा अधिवक्ता डा नाराणणदत्त कँडेल, राजेन्द्र सेढाई, सुरज बस्नेतले बहस गर्ने छन् ।

सो मुद्दाको बहस क्रममा पहिलो दिन सरकारी वकिलका तर्फबाट जिल्ला सरकारी वकिलका प्रमुख प्रेमराज पौडेल, गोकर्ण घिमिरे, पवित्रा भण्डारी, वसन्त पोखरेल र सुनिल लामिछानेले बहस गरेका थिए भने उच्च सरकारी वकिल कार्यालय बुटवलका तर्फबाट सोमकान्त भण्डारी, प्रकाश मरासिनी र रवि न्यौपानेले बहस गरेका छन् ।

जाहेरीकर्ताका तर्फबाट २ जना र प्रतिवादीका तर्फबाट ५ जनाले बहस गर्ने भएकाले आजै थुनछेक आदेश आउने सम्भावना छ ।