एजेन्सी । दक्षिण कोरियाका कार्यवाहक राष्ट्रपति तथा प्रधानमन्त्री हान डक–सूले बिहीवार एक टेलिभिजन सम्बोधनमार्फत पदत्यागको घोषणा गरेका छन्। राष्ट्रले सामना गरिरहेको राजनीतिक र सामाजिक संकटका बीच आफूले जिम्मेवारीपूर्वक निर्णय लिएको उनले जनाए। हानले सत्ता होइन, स्थायित्व प्राथमिकता भएको उल्लेख गर्दै देशलाई एकजुट पार्ने प्रयासमा आफूले बाधक नबन्ने अठोट व्यक्त गरे।

हानले सम्बोधनमा चेतावनी स्वरमा भने, “जबसम्म चरम राजनीतिक स्वार्थ त्यागिएको छैन र आपसी सहयोगको आधार निर्माण भएको छैन, तबसम्म जुनसुकै सरकार आए पनि देशभित्रको विभाजन र द्वन्द्वको दोहोरिने सम्भावना उच्च रहन्छ।” उनले दक्षिण कोरियाको हितका निम्ति भविष्यमा आफूले योगदान पुर्‍याउने प्रतिबद्धता पनि व्यक्त गरे।

उनको राजीनामासँगै उपप्रधानमन्त्री तथा अर्थमन्त्री चोई साङ–मोक कार्यवाहक राष्ट्रपतिको जिम्मेवारीमा प्रवेश गर्नेछन्। यस परिवर्तनले देशको राजनीतिक सन्तुलनमा नयाँ तरंग ल्याउने आँकलन गरिएको छ।

यसबिच, हानले आगामी शुक्रवार जुन ३ मा हुने राष्ट्रपति निर्वाचनमा उम्मेदवारी घोषणा गर्ने अनुमान गरिएको छ। पूर्वराष्ट्रपति युन सुक–योलको पतनपछि रूढिवादी मतदाताको आशा बोकेका सम्भावित उम्मेदवारमध्ये हान एक हुन्। युनलाई मार्शलल योजना असफल भएपछि पदच्युत गरिएको थियो।

हालै सार्वजनिक गरिएको एक सर्वेक्षणले हानको समर्थन दर १३ प्रतिशत रहेको देखाएको छ, जुन रूढिवादी ‘पिपुल पावर पार्टी’भित्रका अन्य सम्भावित उम्मेदवारको भन्दा अगाडि छ। यद्यपि यो समर्थन दर उदारवादी डेमोक्रेटिक पार्टीका उम्मेदवार ली जे–म्युङले प्राप्त गरेको ४२ प्रतिशतको तुलनामा उल्लेखनीय रूपले कम हो।

हानको निर्णयले दक्षिण कोरियाको राजनीतिमा नयाँ अध्याय सुरु हुने संकेत दिएको छ। अबको प्रश्न भनेको के उनको उम्मेदवारीले रूढिवादी मतहरूलाई एकीकृत गर्न सक्नेछ वा उनले राष्ट्रपतिको दौडमा प्रतिस्पर्धा मात्र थप्ने हुन् भन्ने हो।