अन्तर्राष्ट्रिय

फ्लाईदुबईको विमानका दुवै पाइलटलाई अनुसन्धानका लागि अबुधाबी लगियो

एजेन्सी
आश्विन १६, २०८३ शुक्रवार

फ्लाईदुबईको विमानका दुवै पाइलटलाई अनुसन्धानका लागि अबुधाबी लगियो

अ +
अ
अ -

काठमाडौँ । दुबईबाट तेल अभिभका लागि उडेको फ्लाईदुबईको विमानका क्याप्टेन र सहचालकलाई साउदी अरबमा आपत्कालीन अवतरणपछि अबुधाबी लगिएको छ ।

साउदी अरब र संयुक्त अरब इमिरेट्सका अधिकारीहरूले प्रारम्भिक अनुसन्धान गरिरहेका बेला दुवै पाइलटको स्वास्थ्यमा सुधार भएपछि उनीहरूलाई अबुधाबी लगिएको हो ।

फ्लाईदुबईको उडान एफजेड १०७३ मा १७४ यात्रु र ८ जना चालक दलका सदस्य थिए । सेप्टेम्बर ३० मा दुबईबाट तेल अभिभतर्फ उडेको विमानले बिहान ९: ४५ बजे साउदी अरबको तबुक विमानस्थलमा सुरक्षित आपत्कालीन अवतरण गरेको थियो ।

घटनापछि यात्रुको यात्रा जारी राख्न त्यही दिन दुईवटा वैकल्पिक विमान तबुक पठाइएको थियो । यात्रुहरू साँझ ५: ४० बजे फ्लाईदुबईकै अर्को विमानबाट गन्तव्यतर्फ लागेका थिए भने चालक दलका अन्य सदस्य अर्को उडानबाट दुबई फर्किएका थिए । क्याप्टेन र सहचालकलाई भने उपचारका लागि तबुकस्थित अस्पताल लगिएको थियो ।

साउदी अधिकारीहरूले संयुक्त अरब इमिरेट्सको सुरक्षा टोलीको सहभागितामा गरेको प्रारम्भिक अनुसन्धानअनुसार सहचालकले क्याप्टेनमाथि आक्रमण गरेका थिए, जसबाट दुवै जना घाइते भएका थिए । स्वास्थ्यमा सुधार आएपछि चिकित्सकले यात्रा गर्न अनुमति दिएपछि दुवै पाइलटलाई संयुक्त अरब इमिरेट्सका सुरक्षा अधिकारीको साथमा अबुधाबी लगिएको हो ।

अबुधाबी पुगेपछि दुवै पाइलटसँग थप सोधपुछ गरिने बताइएको छ । घटनाको वास्तविक कारण र विमानभित्र भएको घटनाबारे साउदी अरब तथा संयुक्त अरब इमिरेट्सका सम्बन्धित निकायले अनुसन्धान जारी राखेका छन् ।