पीएचपी शेल सुरक्षा जोखिमपछि केही सरकारी वेबसाइट अस्थायी रूपमा बन्द

सेतोमसी
कार्तिक ६, २०८३ बिहिवार

पीएचपी शेल सुरक्षा जोखिमपछि केही सरकारी वेबसाइट अस्थायी रूपमा बन्द

अ +
अ
अ -

काठमाडौं । पीएचपी प्रविधिमा देखिएका गम्भीर सुरक्षा कमजोरीका कारण नेपालका केही सरकारी वेबसाइट तथा प्रणाली अस्थायी रूपमा बन्द गरिएको छ ।

प्रधानमन्त्री तथा मन्त्रिपरिषद्को कार्यालयअन्तर्गतको सफ्टवेयर विकास तथा सञ्चालन केन्द्रले जारी गरेको सूचनाअनुसार ‘पीएचपी२शेल’ नामक सुरक्षा जोखिमका कारण पीएचपीमा आधारित प्रणालीहरू प्रभावित भएका छन् । उक्त जोखिमलाई ‘सीभीई–२०२६–१०९६१८’ र ‘सीभीई–२०२६–१०९६१९’ का रूपमा पहिचान गरिएको छ । यसको गम्भीरता मापन ९.२ रहेको जनाइएको छ ।

केन्द्रका अनुसार यो सुरक्षा कमजोरीको दुरुपयोग गरेर आक्रमणकारीले प्रयोगकर्ताको लगइनबिनै सर्भरमा हानिकारक कोड चलाउन सक्छन् । सम्भावित क्षति रोक्न सावधानीस्वरूप केही सरकारी वेबसाइट तथा प्रणाली अस्थायी रूपमा बन्द गरिएको हो ।

बडादशैंको समयमा समेत सफ्टवेयर विकास तथा सञ्चालन केन्द्र र सम्बन्धित प्राविधिक टोलीहरू सुरक्षा जोखिम नियन्त्रण गर्न निरन्तर खटिएको सूचनामा उल्लेख छ ।

सुरक्षा सुधारसम्बन्धी प्याच लागू गर्ने र आवश्यक परीक्षण पूरा भएपछि बन्द गरिएका प्रणाली क्रमशः पुनः सञ्चालनमा ल्याइने केन्द्रले जनाएको छ । सेवा अवरुद्ध हुँदा परेको असुविधाप्रति केन्द्रले क्षमायाचना गर्दै सेवाग्राहीलाई धैर्य गर्न आग्रह गरेको छ ।