रुपन्देही क्षेत्र नं.१ बाट काटियो घनश्यामको नाम, ३ बाट मात्रै सिफारिस

सेतोमसी
भाद्र २५, २०७९ शनिवार

रुपन्देही क्षेत्र नं.१ बाट काटियो घनश्यामको नाम, ३ बाट मात्रै सिफारिस

अ +
अ
अ -

बुटवल । नेकपा एमालेका स्थायी कमिटी सदस्य घनश्याम भूसाल रुपन्देही क्षेत्र नंं ३ मा उम्मेदवार सिफारिस भएका छन् । ३ सँगै क्षेत्र नम्बर १ को कमिटीले पनि उनको नाम सिफारिस गरेको थियो । तर जिल्ला र प्रदेश कमिटीले क्षेत्र नम्बर १ बाट उनको नाम हटाएको छ ।
२०७४ को चुनावमा भूसाल क्षेत्र नम्बर ३ बाट प्रतिनिधिसभा सदस्य निर्वाचित भएका थिए । यद्यपि उनको घर भने क्षेत्र नम्बर १ मा पर्छ ।

यो पटक क्षेत्र नम्बर १ को कमिटीले भूसालको नाम पनि सिफारिस गरेको थियो । उनीसँगै पार्टीका सचिव छविलाल विश्वकर्मा, टीकाराम चापागाई लगायतको नाम सिफारिस भएको थियो ।

क्षेत्र नम्बर ३ बाट भूसालसंगै तिलोत्तमाका पूर्वमेयर बासुदेव घिमिरे, पूर्वसांसद यज्ञजित शाह र दुर्गाप्रसाद भूसाल सिफारिस भएका थिए । अध्यक्ष केपी शर्मा ओलीसँग फरक मत राखेकै कारण भूसाललाई सर्वसम्मत उम्मेदवार हुन नदिइएको उनी निकट नेताहरु बताउँछन् ।

३० वैशाखको स्थानीय चुनावमा पाएको मतका आधारमा पनि एमालेका लागि ३ भन्दा १ सहज देखिन्छ । भूसालले पनि ३ भन्दा आफ्नो घर भएको १ नम्बर क्षेत्रबाट लड्ने रुची देखाएका थिए ।

तर जिल्ला कमिटीले भूसाललाई रुपन्देही ३ मा मात्र उम्मेदवार बनाउन उपयुक्त हुने रायसहित प्रदेश कमिटीमा सिफारिस गरेको जनाईएको छ ।

‘क्षेत्र नंं १ बाट पनि उहाँको नाम आएको सत्य हो,’ पार्टी स्रोतले भन्यो, ‘एउटै व्यक्ति दुई क्षेत्रमा उम्मेदवार नहुने भएकाले उहाँलाई यसअघि जितेको क्षेत्र नै उपयुक्त हुन्छ भन्न रायसहित नाम पठाएका हौं ।’