सोमबार बिहान मौलाकालिका केवलकार प्रालिद्वारा निर्मित मौलाकालिका केवलकारको उद्घाटन गर्दै प्रचण्डले आफ्नै पहलमा बैंकहरूले ब्याजदरमा कमी ल्याएको र वैशाख महिनाभित्रै ब्याजदरमा थप सुधार ल्याउने गरी काम भइरहेको बताएका हुन् ।
‘केही महिनाअघिसम्म व्यवसायीहरू निकै ठूलो संकटमा थिए । अहिले त्यसमा क्रमशः सुधार आउँदैछ । बैंकको ब्याजदर केही घटेको छ । यो महिनाभित्र थप केही घट्छ,’ प्रचण्डले भने ।
अघिल्लोपटक आफूले सरकारको नेतृत्व लिँदा पनि अर्थतन्त्र अफ्ठेरोमा रहेको र त्यसमा सुधार आएको उनले बताए । ‘अघिल्लोपटक मैले प्रधानमन्त्रीको जिम्मेवारी लिँदा पनि अर्थतन्त्र अप्ठ्यारोमै थियो । तर, निकै ठूलो दुःख र मेहेनतपछि त्यसमा राम्रो सुधार आयो । ७.५ प्रतिशतको आर्थिक वृद्धि हासिल गरियो,' प्रचण्डले, 'राजनीति र अर्थतन्त्र दुवैमा राम्रो प्रगति भयो । त्यसपछि नेपाली कांग्रेसका सभापति देउवाजीलाई प्रधानमन्त्री हस्तान्तरण गरिदिएँ । अहिले पनि म त्यस्तै परिस्थितिमा प्रधानमन्त्री भएको छु । यतिबेला मैले अघिल्लो कार्यकाल सम्झिरहेको छु ।’
उत्पादन र रोजगारीमा लगानी केन्द्रित नगरी समृद्धि र विकासको लक्ष्य हासिल हुन नसक्ने उनको भनाइ छ । ‘उत्पादन र रोजगारीमा लगानी केन्द्रित नगरी समृद्धि र विकासको लक्ष्य हासिल गर्न सकिँदैन । त्यसैले सरकारको नीति, कार्यक्रम र बजेटलाई त्यतातर्फ केन्द्रित गर्न खोजेका छौँ,’ प्रचण्डले भने, ‘अर्थतन्त्र लयमा फर्किन थालेको छ । यसले उत्साहजनक नतिजा दिने मैले विश्वास लिएको छु । अर्थतन्त्रमा राम्रो सुधार ल्याएर, देशले सम्झिनलायक केही कामहरू गरेर सहमतिअनुसार प्रधानमन्त्री पद हस्तान्तरण गर्ने इच्छाका साथ काम गरिनेछ ।’
मौलाकालिका राष्ट्रिय रूपमा नै पर्यटकीय केन्द्र बन्दै गएको उनले बताए । ‘मौलाकालिका राष्ट्रिय रूपमा नै पर्यटकीय केन्द्र बन्दै गएको छ । मौलाकालिका, देवघाट, राष्ट्रिय निकुञ्ज, नारायण नदी आफैँमा पर्यटनका ठूला गन्तव्यहरू हुन्,’ प्रचण्डले भने, ‘यो परियोजनाले यी क्षेत्रहरूलाई जोड्नेछ । यस क्षेत्रको धार्मिक, सांस्कृतिक एवं प्राकृतिक पर्यटनमा गुणात्मक प्रगति हासिल हुनेछ भन्ने विश्वास लिएको छु । चितवन र नवलपुरलाई विशेष आर्थिक क्षेत्रको रूपमा विकास गर्नुपर्छ । यसो गर्दा यहाँको विकासले क्रान्तिकारी फड्को मार्नेछ ।’
निजी क्षेत्रलाई माथि उठाउन ठूलो मेहनत गरिएको उनको भनाइ छ । ‘निजी क्षेत्रलाई संकटबाट मुक्त गर्न र माथि उठाउन यसबीचमा ठूलो मेहेनत गरिएको छ । मेहेनतको सबै नतिजा त आइसकेको छैन, तर क्रमशः सुधार भएको छ । निजी क्षेत्रसँग अर्थपूर्ण सहकार्य नगरी नेपालको समृद्धि र विकासले गति लिन सक्दैन भन्नेमा म प्रष्ट छु । उत्पादन वृद्धि र रोजगारी सिर्जनामा निजी क्षेत्रको भूमिका नै मुख्य रहन्छ । त्यसमा राज्यले आवश्यक वातावरण निर्माण, व्यवसायमैत्री कानुन र सुरक्षा प्रबन्धको व्यवस्था गर्नुपर्छ,’ प्रधानमन्त्रीले भने ।
कार्यक्रममा गण्डकी प्रदेश प्रमुख पृथ्वीमान गुरूङ, नेपाली कांग्रेसका नेता शशांक कोइराला, केवलकारका अध्यक्ष एवं नेपाल उद्योग वाणिज्य महासंघका अध्यक्ष चन्द्र ढकाल लगायतले सम्बोधन गरेका थिए ।
नवलपुरको गैंडाकोट नगरपालिकामा निर्माण सम्पन्न यस परियोजना १३ महिनामा सम्पन्न गरिएको अध्यक्ष ढकालले जानकारी दिए । १.२ किलोमिटर लम्बाइ रहेको केवलकार र होटल निर्माणमा प्रालिले करिब २ अर्ब लगानी गरेकोसमेत उनले बताए ।
.gif)