प्रदेश सभालाई अझै स्वायत्त र सबल बनाउनुपर्छ : सभामुख घर्ती

सेतोमसी
आषाढ १६, २०८० शनिवार

प्रदेश सभालाई अझै स्वायत्त र सबल बनाउनुपर्छ : सभामुख घर्ती

अ +
अ
अ -

बुटवल । लुम्विनी प्रदेश सभाका सभामुख तुलाराम घर्ती मगरले प्रदेश सभालाई अझै स्वायत्त र सबल बनाउनु पर्ने आवश्यकता औल्याएका छन् ।

६५ औँ संसद् दिवसको अवसरमा शनिवार शुभकामना सन्देश जारी गर्दै उनले संसदको गरिमा र आवश्यकताको महत्व बोध गरी शक्ति पृथकीकरणको संसदीय सिद्धान्त अनुरुप विधायीकाको समेत कार्य गर्ने प्रदेश सभालाई अझै स्वायत्त र सबल वनाउनु पर्ने जनाएका हुन्।

सभामुख घर्ती मगरले नेपालको राजनीतिक परिपेक्ष्यमा यसको छुट्टै गरिमा र महत्व रहेको जनाउदै संसदको गरिमालाई बचाउदै जनताको समस्यालाई मुखरीत गरी प्रदेश सभाप्रति विश्वास दिलाउन सकिने बताएका छन्।

विसं २०१६ असार १६ गते नेपालको पहिलो ‘संसद्’को बैठक बसेको थियो । प्रथम संसद्ले १८ महिना पार नगर्दै विसं २०१७ मा संसदीय व्यवस्था विघटन भयो । २०४६ सालको जनआन्दोलनबाट प्रजातन्त्र पुनःस्थापना भई प्रतिनिधिसभा र राष्ट्रियसभा ‘संसद्’ को पुनःबहाली भयो । हाल प्रतिनिधिसभा र राष्ट्रियसभा सहितको द्विसदनात्मक ‘सङ्घीय संसद्’ कार्यान्वयनमा रहेको छ ।