पहिरोले घर पुरिँदा दोलखामा बालकको मृत्यु, ३ जना बेपत्ता

सेतोमसी
श्रावण १९, २०८० शुक्रवार

पहिरोले घर पुरिँदा दोलखामा बालकको मृत्यु, ३ जना बेपत्ता

प्रतीकात्मक तस्वीर

अ +
अ
अ -

दोलखा । पहिरोले दोलखामा घर पुरिँदा एक बालकको मृत्यु भएको छ।

गौरीशंकर गाउँपालिका वडा नम्बर ७ मार्बु टोपाटारमा बिहीबार बेलुकी ९ बजे खसेको पहिरोले टोपबहादुर थामीको घर पुरिँदा उनका १५ महिनाका छोरा प्रिन्स थामीको मृत्यु भएको हो।

जिल्ला प्रहरी कार्यालय दोलखाका प्रवक्ता प्रहरी निरीक्षक राजेश सिग्देलले शुक्रबार बिहान बालकलाई मृत फेला पारिएको बताए।

पहिरोले दुई घर पुरिएको छ। पहिरोले ६ वटा घरमा क्षति पुर्‍याएको प्रहरीले जनाएको छ।

पहिरोले घर पुरेको घटना प्रहरीले आज बिहान मात्रै खबर पाएको थियो।

पहिरोमा पुरिएर ३ जना बेपत्ता छन् भने ३ जना घाइते भएका छन्। ४९ वर्षीय हरिलाल श्रेष्ठ, ६० वर्षीय कृष्णबहादुर मगर र ५० वर्षीया देवी माया मगर बेपत्ता रहेको प्रहरीले जनाएको छ।

टोपाटारका ४० वर्षीय यज्ञबहादुर थामी, उनकी श्रीमती ३९ वर्षीय धनमाया थामी र बुहारी २२ वर्षीया सिता थामी घाइते भएका छन्। उनीहरूलाई उपचारका लागि सिंगटी पठाइएको छ।

बेपत्ताको खोजी गर्न ९ जना नेपाल प्रहरी, २५ जना नेपाली सेना र १२ जना सशस्त्र प्रहरी खटाइएको छ।

घाइतेको उद्धारका लागि हेलिकप्टर मगाइएको उनले बताए।