भवानीपुरमा तीनदिने रामनवमी मेला सुरु

सेतोमसी सहकर्मी

अ +
अ
अ -

देवदह । रुपन्देहीको देवदह-४ भवानीपुरमा तीनदिने रामनवमी मेला सुरु भएको छ । कोलिय राज्य बुद्ध मावली क्षेत्र विकास समितिले आयोजना गरेको मेलामा टिकुली दौड, ढकिया दौड, अन्तर आमा समूह स्तरिय रसी दौड प्रतियोगिता र भजन गायन प्रतियोगितासमेत हुने जनाईएको छ ।

मेलाको उद्घाटन समारोहलाई सम्बोधन गर्दै संघीय सरकारका भुमिसुधार, सहकारी तथा गरिबी निवारण मन्त्री बलराम अधिकारीले ऐनहरू एक आपसमा बाझिएको हुनाले लालपुर्जा वितरणको काम प्रभावकारी रूपमा अघि बढ्न नसकिएको बताए । उनले भुमिसुधार मन्त्रालय र वन तथा वातावरण मन्त्रालयको निति र ऐन बाझिएको कारण काम गर्न गार्ह्यो भएको जिकिर गरे ।

सोही कार्यक्रममा बोल्दै लुम्बिनी विकास कोषका कोषाध्यक्ष सिद्धिचरण श्रेष्ठले रामनवमी मेला चैते दशैको अवसरमा एकदिन मात्र मेला लाग्ने गरेको भएपनि अहिले ३ दिन सम्म मेला संचालन भएकोमा खुसी व्यक्त गरे । उनले रामनवमी कार्यक्रम ९ दिन नै गर्न सके यसले पर्यटन विकाससंगै संस्कृतिको रक्षासमेत हुने विचार व्यक्त गरे ।

कार्यक्रममा देवदह नगर प्रमुख धुर्व प्रसाद खरेल, उपप्रमुख विद्यालक्ष्मी गुरुङ, पुर्व नगर प्रमुख हिरा बहादुर केसी लगायतको उपस्थिति रहेको थियो ।

कार्यक्रममा कोलिय राज्य बुद्ध मावली क्षेत्र विकास समिती अध्यक्ष लिला बल्लब भट्टराईको अध्यक्षतामा र देवदह वडा नं ४ का वडा अध्यक्ष दमननाथ रेग्मीको स्वागतमा रहेको थियो ।

मेलामा उज्यालो लालटिन प्रतिष्ठानले निशुल्क स्वास्थ्य सेवा, नेपाल मगर संघ देवदह र थारू कल्याणकारी सभा देवदहले निशुल्क पिउने पानी वितरण गर्ने आयोजकले जनाएको छ ।