विष्णु पोखरेल, देवदह । नवलपरासीको सुनवल नगरपालिका वडा नं. १३ मा नश्ल सुधारको लागि अष्ट्रेलियाबाट ल्याईएको बोयर जातको बोका काटेर दशैं मनाईएको छ । नगरपालिकाले करिव तीन लाख खर्चिएर ल्याएको उक्त बोका, बोका पालक किसान गंगाराम गैरेले अष्टमीको दिन काटेका हुन् ।

स्रोतले  सेतोमसीलाई दिएको जानकारीलाई थप पुष्टि गर्न कृषक गैरेलाई घटनाबारे सोध्दा उनले बोका काटेर मासु बेचेको स्वीकार गरे । नगर प्रमुख  भिम बहादुर थापा (भरत), नगर पशुशाखा प्रमुख मिश्री प्रसाद खड्का र वडा अध्यक्ष कृष्ण प्रसाद देवकोटाको सहमतिमा बोका काटिएको गैरेले बताए ।

"बोका विरामी थियो राम्रोसंग काम पनि गरेको थिएन । त्यसैले वडाध्यक्ष ज्युले काटेर मासु खाने भन्नूभयो अनि काटियो" - सेतोमसीसंग कृषक गरैले भने। बोका विरामी भएकोले काटिएको र त्यसको सट्टामा अर्को बोका तयार गरिएको उनको जिकिर छ । "त्यही बोकाको बीउ, अर्को बोका मसंग छ अब त्यही बोका प्रयोग गर्ने कुरा भएको छ" - उनले भने ।

तीन लाखको शुद्ध बोयर जातको बोका काटेर खाने अनि लोकल जातको बोका देखाउने यस्तो कसरी हुन्छ भन्ने हाम्रो प्रश्नमा कृषक गैरेले लोकल भएपनि आफुसंग भएको बोका 'तगडा' भएको दावी गरे ।

यसै विषयमा कुरा गर्दा उक्त बोकाको मासु खानेमध्यका एक खडानन्द कोइरालाले ९ सय रुपैयाँ किलोका दरले आफुले  पनि मासु किनेको बताए । "सुरुमा त मलाई थाहा भएन, पछि नगरपालिकाले अनुदानमा दिएको बोकाको मासु रैछ भन्ने थाहा पाएपछि मैलेपनि यसबारे सोधिखोजी गरें" उनले भने । 

कोईरालाका अनुसार उक्त बोका जम्मा साढे २० केजी भएको थियो । प्रती केजी ९ सयका दरले जसको मासुको मुल्य जम्मा १८ हजार ४ सय ५० हुन आउँछ । यसरी करिव तीन लाख खर्चिएर नश्ल सुधारको लागि नगरपालिकाले अष्ट्रेलियाबाट ल्याएको बोका काटेर दशैं मनाईएको छ ।

यस विषयमा कुरा गर्न खोज्दा वडा नं. १३ का अध्यक्ष कृष्ण प्रसाद देवकोटाको फोन उठेन । नगर प्रमुख भिमबहादुर थापा (भरत) संगपनि सम्पर्क हुन नसकेपछि उप नगरप्रमुख दधिराम अर्यालसंग कुरा गर्दा उनले उक्त पाठोले सर्भिस दिन नसकेकोबारे आफुलाई वडाध्यक्षले ३-४ दिन अघि जानकारी गराएको र आफुले पशुशांखा प्रमुखसंग समन्वय गरेर अघि बढ्न सुझाएको बताए । थप कुरा गर्दै उपप्रमुख अर्यालले विकल्पमा अर्को पाठो तयार गर्ने कुरा पनि वडाध्यक्षले गरेको उल्लेख गर्दै पशुशाखासंग समन्वय नगरी र प्रक्रिया नपुर्याई बोका काटिएको भए कार्वाही गरिने बताए ।

पशुशाखासंग समन्वय गरिएको वा नगरिएको बारे बुझ्न खोज्दा शाखा प्रमुख मिश्री प्रसाद खड्काको मोबाइल स्विच अफ रहेकोले सम्पर्क हुन सकेन ।