ललितपुर । नेपाली कांग्रेसका महामन्त्री गगन थापाले पार्टी सभापति शेरबहादुर देउवाको भन्दा राम्रो प्रधानमन्त्री चलाउन सक्ने नेताहरू कांग्रेसभित्र दर्जनौँ रहेको दाबी गरेका छन् ।

शनिबार ललितपुरमा आयोजित कार्यक्रममा बोल्दै थापाले आफैँ पनि देउवा प्रधानमन्त्री बन्ने विश्वास राख्ने भए पनि पार्टीभित्र धेरैजसो नेताहरू त्यो जिम्मेवारी अझ प्रभावकारी ढंगले वहन गर्न सक्षम रहेको बताएका हुन् ।

"म मेरो पार्टी सभापति अबको १२–१५ महिनापछि प्रधानमन्त्री हुने भन्ने विश्वास राख्छु," उनले भने, "तर उहाँभन्दा मेरो पार्टीभित्र अरु दर्जनौँ मान्छेले राम्रो प्रधानमन्त्री चलाउँछन् भन्ने म विश्वास गर्छु ।"

कार्यक्रममा थापाले नेपालको राजसंस्थाका सन्दर्भमा पनि धारणा व्यक्त गरे । उनले नेपालको राजसंस्थालाई न हिजो, न भोलि कहिल्यै पनि संवैधानिक बनाउन नसकिने उल्लेख गर्दै अहिलेको बहस संवैधानिक राजतन्त्र या गणतन्त्रबीच नभई सिधै ‘राजा कि गणतन्त्र’ भन्ने स्पष्ट विकल्पमा केन्द्रित हुनुपर्ने धारणा राखे ।

राजतन्त्रको बहसलाई चुनौती दिँदै थापाले पूर्वराजा ज्ञानेन्द्र शाहलाई सिधै राजनीतिक मैदानमा आउन आग्रह गरे। “राजतन्त्र ल्याउने हो भने सिधै आउनुपर्छ। बार्गेनिङको कुरा नगरौं,” उनले भने। “राजतन्त्र आएपछि के हुन्छ ? योजना के छन् ? रोजगारी, शिक्षा, स्वास्थ्यमा समाधान के छन् ? यस्ता प्रश्नको जवाफ दिन सक्नुपर्छ ।”

राजनीतिक यात्राको सुरुवात विद्यार्थी राजनीति हुँदै गरेको स्मरण गर्दै थापाले विगतमा कांग्रेसले संवैधानिक राजतन्त्र र बहुदलीय प्रणालीलाई दुई स्तम्भ मानेर अघि बढेको बताउँदै राजसंस्था भने कहिल्यै कांग्रेसको मूल्य र मान्यताको अनुयायी बन्न नसकेको दाबी गरे ।

"कांग्रेस कहिलेकाहीँ राजावादी भयो होला, तर नेपालको राजसंस्था कहिल्यै राजावादी भएन । त्यो जहिल्यै राजतन्त्रवादी मात्र रह्यो," उनले स्पष्ट पारे ।