कविता

कविता - 'म'

रामचन्द्र तिम्सिना
कार्तिक ६, २०७८ शनिवार

अ +
अ
अ -

कविता - 'म'

जन्मिदैमा भोट गन्ती भएको मान्छे हुँ म
बामे सर्दै गर्दा झण्डा बोकाइएको ब्यक्ती हुँ म
सर्टिफिकेट मिल्काएर पासपोर्ट बनाएको जनता हुँ म
प्रशासनले नागरिकता नथमाउँदै
पार्टीले सदस्यता थमाएको युवा हुँ म ।

धुलिखेलको जिपलाइनमा प्रचण्डहरु मच्चिदै गर्दा
बालुवाटार देखि बालकोट सम्म ओलिहरु गुड्दै गर्दा
बैतडीको आकाशमा देउवाहरु उड्दै गर्दा
आँसु पुछ्दै फुलपातीको दिनमा बिमानस्थल छोड्दै गरेको नेपाली हुँ म ।

न्यायको तराजुमा चोलेन्द्रको भागबन्डा हेर्दै
एमसिसीमा भिम रावलको रास्ट्रवाद नियाल्दै
मन्त्री बन्न प्रेम आलेको इमानदारीता पछ्याउँदै
नेताहरुको च्यांखे दाउ र झिंगे दाउले आजित
कानुनले कलम रोकेको
ॠणले घाँटी थिचेको
गुण्डाले मुख थुनेको नागरिक हुँ म।

न्याय कै खोजीमा दाङ देखि काठमाडौ
पैदल आएका चेलीहरु
उखुको आँशुले काठमाडौका सडकहरु
तरलम्मै भिजाएका किसानहरु
घरको जमरा सेलाएकै दिन
खेतमा जमरा उमार्ने किसान हुँ म ।

- रामचन्द्र तिम्सिना (आवाज)
म्यागङ ५ सामरी, नुवाकोट