देवदह । केरवानी माध्यमिक विद्यालयले साधारण तथा प्राविधिक शिक्षा तर्फ २०८१ को एसईई परिक्षामा सफल विद्यार्थीलाई बधाई तथा शुभकामना सहित सम्मान गरेको छ । मंगलवार विद्यालयमा एक कार्यक्रम आयोजना गरी विद्यालयले एसईई उत्तिर्ण विद्यार्थीलाई सम्मान गरेको हो ।

सम्मान कार्यक्रममा बोल्दै देवदह नगरपालिकाका प्रवक्ता एवम् वडा नं ५ का अध्यक्ष गणेश डुम्रेले शैक्षणिक वातावरण सुधार भएमा सामुदायिक विद्यालयले उत्कृष्ट नतिजा ल्याउन सक्ने बताए । उनले केरवानीले यो पटक एसईईमा ल्याएको नतिजाले उक्त कुरालाई पुष्टि गरेको बताए । 

अध्यक्ष डुम्रेले नगरपालिकाले शिक्षा सुधारका लागि ३ बर्ष यता गरेको प्रयास सफल भएको बताउँदै यो नतिजालाई कायम राख्न र अझ माथि उठाउन अव सबैले मेहनत गर्नुपर्ने बेला आएको उल्लेख गरे । उनले भने, ‘अव हाम्रो सामु चुनौती थपिएको छ । यो चुनौती अर्थात नतिजालाई कायम राख्नको लागि नगरपालिकाले के गर्नुपर्छ हामी गर्छौ, तर शिक्षक, अभिभावक र विद्यार्थीहरुले पनि यसबारे गम्भिर भएर सोँच्नुपर्छ ।’ 

कार्यक्रममा विद्यालयका प्रअ निर्मल ढुङ्गानाले आफुँ चुनौतीको सामना गर्न तयार रहेको भन्दै नमुना विद्यालयको उपमा पाएको केरवानीको साख जोगाउन अहोरात्र खटिरहेको बताए । उनले देशभर रहेका ३५ हजार विद्यालयमध्ये चार सय २२ बिद्यालयलाइ राज्यले नमुना बिद्यालयको रुपमा छनोट गरेको भन्दै रुपन्देहीमा छनोट भएका ९ वटा विद्यालयमा केरवानी पर्नु सुखद भएको उल्लेख गरे । त्यसमध्येपनि गतबर्ष राज्यले जिल्लामा उत्कृष्ट कामगर्ने ३ वटा विद्यालय छनोट गर्दा त्यसमा केरवानी परेको उनले जानकारी दिए । 

विद्यार्थीहरुले ११, १२ कक्षाका लागि अन्यत्र धाउनुपर्ने स्थिति नरहेको उल्लेख गर्दै प्रअ ढुङ्गानाले केरवानी माविलाई शैक्षिक गन्तव्यको रुपमा विकास गर्न आफ्नो टिम लागिपरेको बताए । उनले भने, ‘एसईई पास भैसकेपछी के विषय पढ्ने भन्ने विद्यार्थीमा कौतुहलता हुन्छ, त्यसैले विषय छनोट गर्दा पारिवारको अवस्था र आफ्नो क्षमता समेतलाइ मध्यनजर गर्न विद्यार्थीहरुलाई आग्रह गर्दछु ।’ 

केरवानी मावि को नतिजा अहिलेसम्मकै उत्कृष्ट भएको उल्लेख गर्दै प्रअ ढुङ्गानाले अब यो नतिजालाइ कमजोर हुन नदिने प्रतिवद्धता व्यक्त गरे ।  

कार्यक्रममा देवदह आदर्श बहुमुखी क्याम्पसका अध्यक्ष बासुदेव रिमाल, युगज्योति मावि देवदह–६ का प्रअ यमलाल अर्याल, विद्यालयका सहायक प्रअ खेमानन्द ज्ञवाली, कक्षा ११ र १२ का संयोजक कृष्ण ज्ञवाली, शिक्षक युवराज ढकाल, भिमदेव ढकाल लगाएतले बोल्दै सामुदायिक विद्यालयको शिक्षा सुधारका लागि सबैले भुमिका खेल्नुपर्ने बताए ।

सम्मान कार्यक्रममा एसईईमा उत्कृष्ट अंक सहित उत्तिर्ण हुने सम्पूर्ण विद्यार्थी एवम् उत्कृष्ट नतिजा दिने शिक्षकहरुलाई सम्मान गरिएको थियो । 
सम्मान कार्यक्रमसँगै समृद्ध समुदाय विकास केन्द्रका निर्देशक युवराज चापागाईले विद्यार्थीहरुलाई आफ्नो जिम्मेवारी र भविष्यवारे सचेत गराउन उत्प्रेरणा प्रदान गरेका थिए ।

विद्यालय व्यवस्थापन समितिका अध्यक्ष विरेन्द्र पाण्डेको अध्यक्षता, शिक्षक कमल ज्ञवालीको स्वागत र यज्ञप्रसाद न्यौपानेको सञ्चालनमा कार्यक्रम भएको हो ।