जनताको सपना बेचेर
नोट बोरामा कोचेर
चुनावमा भोट लुट्ने
बुथको ढोका फुट्ने ।।
राति–राति भैँसी काटेर
मुस्कानमा मिठो बोली साटेर
हातमा टिकट, मुखमा वाचा
सत्तामा पुग्दा हुन्छ साचा ?
"हामी जनताको सेवक हौं"
भन्नेहरू सेवक होइन
जनताको पसिना चाट्ने
राष्ट्रकाे दोहन महाशोकिन ।।
भोट त माग्छन टाउको निहुराइ
जितेपछि टाउको उठाएर घुराइ
जनताको काम छुट्याइ राख्ने
आफ्नालाई जागिरमा च्याप्ने ।।
कसको छोरा, कसको भतिज
नेताको सिफारिस उसको रोज
मेरिटको कुरा छैन यहाँ
योग्य पाउँदैन नेताका आफन्त छन जहाँ ।।
मदिरा, मासु, टिसर्ट बाँड्ने
गाउँभरि झूटका गफ हान्ने
भोट आउँदा जनता राजा
जितेपछि जनता जा गएनी जा ।।
कम्पनीको सेटिङ मिलाएर
टेण्डरको भाँडो टिपाएर
बजेटको भात पचाउन
जनताको आँसु सुकाउन ।।
पहिलो वर्ष “यो पुरानो सरकारको गल्ती”
दोस्रो वर्ष “यो देशमै संकट”
तेस्रो वर्ष “हामी अझै योजना बनाउँदैछौं”
चौथो वर्ष चुनावको फित्ता काट्दैछौं ।।
जनता त फेरि पनि पर्खने,
भोलि त केहि राम्रो हुन्छ भन्ने,
तर नेता त फेरि पनि फर्कने—
बुथ कब्जा र पैसा बोक्ने ।।
जनताले छाप त्यहि ठोक्ने
सत्तामा जान यिनलाई कस्ले रोक्ने
आफ्नालाई रोजी रोजी
अर्कालाई खोजी खोजी ।।
कङ्गाल बनाए यो देशलाई
युवा सबै विदेशलाई
खेतबारी बाझै भयो
यस्ताे देख्दा गणतन्त्रको सातो गयो ।।
.gif)
सेतोमसी मिडिया नेटवर्क प्रा. लि.
देवदह-७, रुपन्देही, लुम्बिनी प्रदेश, नेपाल
फोन नं. : +977-71-577088
मोबाइल नं. : +977-9857029586, +977-9857057732
इ-मेल : setomasimedia@gmail.com
सूचना तथा प्रसारण विभाग दर्ता नं : २२४८/०७७-७८
सम्पादक : विष्णु प्रसाद पोखरेल
कार्यकारी सम्पादक : पूर्णप्रसाद पौडेल (पवन पौडेल)
Copyright © All right reserved to setomasi.com
Site By: SobizTrend Technology
