समाचार

फ्रान्स पुगे प्रधानमन्त्री मोदी

सेतोमसी
जेठ ३१, २०८३ आइतवार

अ +
अ
अ -

काठमाडौँ । भारतका प्रधानमन्त्री नरेन्द्र मोदी औपचारिक भ्रमणका क्रममा फ्रान्सको निस पुगेका छन् ।

प्रधानमन्त्री मोदी १३ देखि १८ जुनसम्म फ्रान्स र स्लोभाकियाको ६ दिने भ्रमणमा रहेका छन् । प्रधानमन्त्री बनेपछि उनको यो सातौँ फ्रान्स भ्रमण हो । भ्रमणका क्रममा उनी फ्रान्सका निस, एभियान र पेरिस शहर जानेछन् । उनी १३ र १४ जुन निसमा रहनेछन् ।

त्यसपछि १६ र १७ जुनमा एभियानमा हुने जी ७ देशको सम्मेलनमा सहभागी हुने कार्यक्रम छ । १८ जुनमा उनी पेरिसमा राष्ट्रपति इमान्युएल म्याक्रोँसँगै ‘भिभाटेक’ सम्मेलनमा सहभागी हुनेछन् ।

यस भ्रमणका क्रममा भारत र फ्रान्सबीच प्रविधि, नवप्रवर्तन, स्वास्थ्य प्रविधि, चिकित्सा प्रविधि, कृत्रिम बुद्धिमत्ता, अर्धचालक तथा अन्तरिक्ष प्रविधिसम्बन्धी करिब १२ वटा सहमतिमा हस्ताक्षर हुन सक्ने बताइएको छ ।

भेटवार्ताका क्रममा दुवै देशबीच ११४ वटा राफेल लडाकु विमान खरिदसम्बन्धी सम्झौतामाथि पनि महत्वपूर्ण छलफल हुने अपेक्षा गरिएको छ। भारतले ती विमानमा आफ्नै हतियार प्रणाली जडान गर्न मिल्ने व्यवस्था चाहेको छ। यससँग सम्बन्धित स्रोत कोडको विषय पनि वार्तामा उठ्न सक्ने बताइएको छ।

यद्यपि उक्त सम्झौताले अझै भारत सरकारको सुरक्षा मामिला सम्बन्धी मन्त्रिपरिषद् समितिबाट अन्तिम स्वीकृति पाएको छैन। प्रधानमन्त्रीको भ्रमणपछि मात्रै यसबारे अन्तिम निर्णय हुने जनाइएको छ।