काठमाडौँ । रसुवाको भोटेकोशी हुँदै त्रिशूली र नारायणी नदीमा आएको बाढीबाट प्रभावितको खोज तथा उद्धार र विपद् व्यवस्थापनका लागि सशस्त्र प्रहरी बल, नेपालले १५ सयभन्दा बढी जनशक्ति परिचालन गरेको छ ।

सशस्त्र प्रहरीले संरचना भत्किएका स्थानमा खोज तथा उद्धार गर्न विशेष तालिम प्राप्त टोलीसहित प्रभावित क्षेत्रमा विपद् प्रतिकार्य आधार शिविर स्थापना गरेको जनाएको छ । उद्धार कार्यलाई प्रभावकारी बनाउन विद्युत् आपूर्ति व्यवस्था, चिकित्सक तथा स्वास्थ्यकर्मी, सामूहिक घाइते उद्धार तथा उपचारका लागि सवारीसाधन, शव व्यवस्थापन विज्ञ, शिविर समन्वय तथा व्यवस्थापन विज्ञ, प्राथमिक उपचार विज्ञ, गोताखोर र तीव्र बहावमा उद्धार गर्न तालिम प्राप्त जनशक्तिसमेत परिचालन गरिएको छ ।

विशेष खोज तथा उद्धार टोलीसहितको जनशक्तिले विभिन्न संरचना, जलविद्युत् आयोजना तथा अन्य प्रभावित क्षेत्रमा सम्पर्कविहीन भएका व्यक्तिको खोजी तथा उद्धार कार्यलाई निरन्तरता दिइरहेको सशस्त्र प्रहरीले जनाएको छ ।

यसैगरी, सशस्त्र प्रहरी बलले तालिम प्राप्त कुकुरसहितको टोली र ६ वटा ड्रोनसहितको टोलीसमेत परिचालन गरेको छ। परिचालित टोलीले पहिचान गरिएका १२ स्थानबाट ९८ वटा शव फेला पारेको, ३० जना घाइतेको उद्धार गरेको र ७३ जनालाई सकुशल उद्धार गरेको जनाएको छ ।

बाढीमा परी घाइते भएकालाई तत्काल प्राथमिक उपचार उपलब्ध गराउन सशस्त्र प्रहरीका चिकित्सकसहितको टोलीले नुवाकोटमा स्वास्थ्य शिविर स्थापना गरी स्वास्थ्य सेवा सञ्चालन गरिरहेको छ । बाढी प्रभावितको तत्काल उपचार गर्न नेपाल सशस्त्र प्रहरी अस्पतालमा समेत १ सय शय्या तयारी अवस्थामा राखिएको छ ।

त्यस्तै, सशस्त्र प्रहरी बल, नेपाल विपद् व्यवस्थापन तालिम शिक्षालय कुरिनटारमा १ सय शय्या क्षमताका विपद् राहत कन्टेनरहरू बाढी प्रभावित क्षेत्रमा तत्काल पुर्‍याउने काम भइरहेको र अन्य क्षेत्रमा रहेका यस्ता राहत कन्टेनरसमेत बाढी प्रभावित क्षेत्रतर्फ केन्द्रित गरी परिचालन गरिएको छ ।

बाढी प्रभावित क्षेत्रमा सशस्त्र प्रहरी बलको प्रधान कार्यालय तथा विभिन्न जिल्लामा रहेका सशस्त्र प्रहरीका एकाइबाट विपद् व्यवस्थापनसम्बन्धी तालिम प्राप्त थप जनशक्तिलाई आवश्यक सामग्रीसहित परिचालन गरिएको सशस्त्र प्रहरीले जनाएको छ ।

भोटेकोशीबाट सुरु भएको बाढी त्रिशूली हुँदै नारायणी नदीसम्म फैलिएको अवस्थामा प्रभावित क्षेत्रमा सम्पर्कविहीनको खोजी, घाइतेको उद्धार, शव व्यवस्थापन र स्वास्थ्य सेवा सञ्चालनलाई प्राथमिकतामा राखेर सशस्त्र प्रहरीले उद्धार अभियान जारी राखेको जनाएको छ ।