भोटेकोशी बाढी

भोटेकोशी बाढी प्रभावितका लागि देवदह नगरपालिकाको ४० लाख ४७ हजार सहयोग

सेतोमसी
भाद्र १५, २०८३ सोमवार

भोटेकोशी बाढी प्रभावितका लागि देवदह नगरपालिकाको ४० लाख ४७ हजार सहयोग

अ +
अ
अ -

रुपन्देही । देवदह नगरपालिकाले भोटेकोशी बाढी प्रभावितलाई राहत स्वरुप ४० लाख ४७ हजार रुपैंया उपलब्ध गराउने निर्णय गरेको छ । भीषण बाढीबाट भएको जनधनको क्षतिप्रति दुःख व्यक्त गर्दै देवदह नगरपालिकाले बाढीपीडितको राहत, उद्धार तथा पुनःनिर्माणका लागि उक्त रकम सहयोग गर्ने निर्णय गरेको हो ।

सोमबार बसेको नगर कार्यपालिकाको बैठकले प्रधानमन्त्री दैवी उद्धार प्रकोप कोषमा उक्त रकम जम्मा गर्ने निर्णय गरेको हो । नगरपालिकाका अनुसार सहयोग रकममा जनप्रतिनिधि, कर्मचारी तथा शिक्षकहरूको समेत योगदान रहनेछ ।

नगरपालिकाले आफ्नो विपद् व्यवस्थापन कोषबाट ५ लाख रुपैयाँ उपलब्ध गराउने भएको छ । यस्तै, जनप्रतिनिधिबाट १० दिन बराबरको सेवा सुविधा, अधिकृतस्तरका कर्मचारी तथा सम्बन्धित शिक्षकहरूबाट ७ दिन बराबरको तलब, सहायकस्तरका कर्मचारी तथा शिक्षकहरूबाट ५ दिन बराबरको तलब र श्रेणीविहीन कर्मचारी, विद्यालय कर्मचारी तथा बाल विकास सहजकर्ताबाट २ दिन बराबरको तलब योगदान गरिनेछ ।

नगरले भोटेकोशी बाढीबाट ज्यान गुमाएकाहरूप्रति श्रद्धाञ्जली व्यक्त गर्दै शोकाकुल परिवारप्रति समवेदना प्रकट गरेको छ । साथै, घाइतेहरूको शीघ्र स्वास्थ्यलाभको कामना समेत गरेको छ ।

प्राकृतिक विपत्तिको वर्तमान अवस्थामा विपद् व्यवस्थापन तथा राहत कार्यमा सहयोग गर्न नगरपालिकाले सम्पूर्ण नगरवासीलाई अपिल गर्दै बाढी प्रभावित क्षेत्रमा परी सम्पर्कविहीन भएका परिवारलाई नगरपालिकामा सम्पर्क गर्न आग्रह गरेको छ ।