सूचना तथा सञ्चार

टेलिफोन र इन्टरनेटको गुणस्तर सुधार्न सञ्चारमन्त्री तिमिल्सिनाको प्राधिकरणलाई निर्देशन

सेतोमसी
आश्विन १५, २०८३ बिहिवार

टेलिफोन र इन्टरनेटको गुणस्तर सुधार्न सञ्चारमन्त्री तिमिल्सिनाको प्राधिकरणलाई निर्देशन

अ +
अ
अ -

काठमाडौं । सूचना तथा सञ्चारमन्त्री डा. विक्रम तिमिल्सिनाले टेलिफोन तथा इन्टरनेट सेवाको गुणस्तर सुधार गर्न नेपाल दूरसञ्चार प्राधिकरणलाई निर्देशन दिएका छन् ।

बिहीबार प्राधिकरणका पदाधिकारीसँगको छलफलमा मन्त्री तिमिल्सिनाले काठमाडौं उपत्यकामै दूरसञ्चार सेवा कमजोर हुनु गम्भीर विषय भएको भन्दै नियमित अनुगमन गरी त्यसको प्रतिवेदन मन्त्रालयमा पेस गर्न निर्देशन दिएका हुन् । उनले तोकिएको मापदण्ड पूरा नगर्ने तथा न्यून गुणस्तरको सेवा उपलब्ध गराउने सेवा प्रदायकमाथि कानुनबमोजिम कडा कारबाही गर्नसमेत निर्देशन दिएका छन् ।

मन्त्री तिमिल्सिनाले चौथो पुस्ताको मोबाइल सेवा विस्तार तथा पाँचौँ पुस्ताको सेवा सुरु गर्ने विषयमा स्पष्ट कार्ययोजना बनाएर अघि बढ्न पनि प्राधिकरणलाई निर्देशन दिएका छन् । छलफलमा प्राधिकरणका पदाधिकारीले गुणस्तर परीक्षणका लागि आवश्यक सवारीसाधन तथा उपकरणको अभाव रहेको जानकारी गराएका थिए। पूर्वाधार र सञ्जाल क्षमतामा पर्याप्त लगानी हुन नसक्दा पनि सेवाको गुणस्तरमा समस्या देखिएको उनीहरूको भनाइ थियो ।

प्राधिकरणका अध्यक्ष अर्जुन घिमिरेले गुणस्तर मापदण्ड पूरा नगर्ने सेवा प्रदायकमाथि कानुनअनुसार कारबाही र जरिवाना गर्ने प्रतिबद्धता व्यक्त गरेका छन्। उनले टेलिफोन तथा इन्टरनेट सेवाको नियमित अनुगमनलाई थप प्रभावकारी बनाउने बताएका छन् ।