सेतोमसी सहकर्मी
'ओ शासक ! तिम्रो दिमाग कहाँ छ ?'
उखुको झ्याङ्भित्रबाट
अझै आवाज आइरहन्छ
'दाइ ! मलाई बचाउनुस् !'
अस्पतालबाट
बिरामीका आफन्त अझै हारगुहार गरिरहेछन्
'लौ न रगत ! लौ न अक्सिजन ! लौ न उपचार !'
परदेशबाट
खबरहरु आइरहन्छन्
'छोरो रहेन ! बा रहनुभएन !'
सत्ताको कौशीमा बसेर
शासक
घोक्रो फुलाउँदै कराइरन्छ
'का.....ग ! का........ग ! का.....ग !'
गरीबको भान्सामा भोक अट्टाहास हाँसिरहेछ !
सरकार सडकमा नाङ्गै दौडिरहेछ !
कोही आफ्नै कपडा च्यातेर
ढाक्न खोजिरहेको छ सरकारको आङ !
तर सरकार आँखा चिम्लेर
दौडिरहेकै छ लगातार
नाङ्गै,
र कुल्चिरहेकै छ फुटपाथमा भोको निदाएका पेटहरु !
बोल्न नसकेर,
बोल्न नजानेर,
बोलीको सुनुवाइ नभएर,
बोल्नुको अर्थ नदेखेर,
चुपचाप चुपचाप छन् जनताहरु ।
म,
यो मुलुकको सबैभन्दा क्रान्तिकारी कवि,
हातमा मोबाइल बोकेर
थिचिरहेछु लगातार
'हार्दिक श्रद्धाञ्जली !'
र आफ्नै काँध थपथपाइरहेछु
'स्याबास् कवि, स्याबास् !'
पिँजडाभित्रबाट
केही सुगाहरु रटिरहेछन्
'ओ शासक ! तिम्रो दिमाग कहाँ छ ?'
- सुदर्शन अधिकारी
सेतोमसी सहकर्मी
.gif)
सेतोमसी मिडिया नेटवर्क प्रा. लि.
देवदह-७, रुपन्देही, लुम्बिनी प्रदेश, नेपाल
फोन नं. : +977-71-577088
मोबाइल नं. : +977-9857029586, +977-9857057732
इ-मेल : setomasimedia@gmail.com
सूचना तथा प्रसारण विभाग दर्ता नं : २२४८/०७७-७८
सम्पादक : विष्णु प्रसाद पोखरेल
कार्यकारी सम्पादक : पूर्णप्रसाद पौडेल (पवन पौडेल)
Copyright © All right reserved to setomasi.com
Site By: SobizTrend Technology
