कविता

कविता : आउ साथी ओखतीको व्यापार गरौं

रामचन्द्र तिम्सिना
जेठ ३०, २०७८ आइतवार

अ +
अ
अ -

कविता : आउ साथी ओखतीको व्यापार गरौं

हिमालको चिसो सिरोटो देखि
तराईको तातो बगर सम्म
गरिबको झुपडी देखि
धनीहरुको महल सम्म
कतै रोग देखाएर गरौं
कतै रोग लुकार गरौं
आउ साथी ओखतीको ब्यापार गरौं ।

कतै सेतो कोट लगाएर गरौं
कतै सिभिल मै गरौं
कतै लाइसेन्स लिएर गरौं
कतै बिना लाइसेन्स नै गरौं
कोहिलाई नाडी छामेर गरौं
कोहिलाई घाँटी छामेर गरौं
आउ साथी ओखतीको ब्यापार गरौं ।

कोहिमा लोगो टाँसेर गरौं
कोहिको लोगो च्यातेर गरौं
नेपाली ब्राण्डमा भारतीय प्रिन्ट गरौं
भारतिय ब्राण्डमा बेलायती प्रिन्ट गरौं
कहिले झोला भिरेर गरौं
कहिले सटर खोलेर गरौं
आउ साथी ओखतीको व्यापार गरौं ।

कोहीले डाक्टरसंग मिलेर गरौं
कोहिले अस्पतालसंग मिलेर गरौं
कतै सरकारसंग मिलेर गरौं
कतै हाकिमसंग मिलेर गरौं
कतै दाँत ङिच्च देखाएर गरौं
कतै दारा ह्वाङ् देखाएर गरौं
आउ साथी ओखतीको ब्यापार गरौं ।

मुटु नभएकालाई अत्याएर गरौं
मुटु भएकालाई पट्याएर गरौं
कोहिलाई कलेजो बिग्रीयो भनेर गरौं
कोहिलाई फोक्सो कुहियो भनेर गरौं
मरेकालाई जिउँदो भनेर गरौं
जिउँदोलाई मर्यो भनेर गरौं
आउ साथी ओखतीको ब्यापार गरौं
आउ साथी ओखतीको ब्यापार गरौं ।

- रामचन्द्र तिम्सिना (आवाज)