बुटवल । ‘म परीक्षा फारम भरेर दिन्छु, भर्ना पनि मिलाइदिन्छु’ भन्ने एउटा सामान्य वाक्य कतिपय विद्यार्थीका लागि विश्वासको विषय हो । अझै विद्यार्थी नै विद्यार्थीका बीच यस्तो भरोसा बढ्दा त्यस्तो भनाइलाई सहजै पत्याउने गरिन्छ । तर, जब विश्वास घातमा परिणत हुन्छ, तब त्यसको असर एउटा व्यक्तिमा मात्र होइन, सिंगो क्याम्पस समुदायमै पर्ने गर्छ ।

बुटवल बहुमुखी क्याम्पसमा यस्तै एउटा घटनाले अहिले निकै तरंग पैदा गरेको छ । क्याम्पसका बीए चौथो वर्षमा अध्ययनरत विद्यार्थी विवेक कुँवरले विभिन्न विद्यार्थीहरूसँग फारम भर्ने तथा भर्ना मिलाइदिने भन्दै कागजात र रकम संकलन गरे पनि काम नगरेको उजुरी परेको थियो । प्रारम्भिक अनुसन्धानपछि प्राप्त प्रमाणहरूका आधारमा विवेक कुँवर दोषी देखिएको भन्दै क्याम्पस प्रशासनले उनलाई निलम्बन गरी क्याम्पस प्रवेशमा समेत रोक लगाउने निर्णय गरेको छ । सेतोमसीसंग कुरा गर्दै क्याम्पस प्रमुख डा. अरुण कुमार क्षत्रीले घटनाको पुष्टि गरे ।

उजुरीमा उल्लेख गरिएअनुसार विवेक कुँवरले क्याम्पसभित्रै धेरै विद्यार्थीहरूलाई सहायता गर्ने नाममा परीक्षा फारम भरिदिने, भर्ना मिलाइदिने आश्वासन दिएका थिए । विद्यार्थीहरूले विश्वास गर्दै कागजात मात्र होइन, शुल्क वापतको रकम समेत कुँवरलाई बुझाए । तर न फारम भरियो, न भर्ना प्रक्रिया अगाडि बढ्यो । जब निश्चित म्यादभित्र प्रक्रिया पूरा नभएपछि विद्यार्थीहरू समस्यामा परे, उनीहरू प्रशासनको ढोका ढकढक्याउन बाध्य भए ।

क्याम्पस प्रमुख डा. अरुण कुमार क्षत्रीले बैशाख १९ गते जारी गरेको सूचनामा भनिएको छ, “उजुरी प्रमाणित भएकाले निज विद्यार्थीलाई क्याम्पसबाट निलम्बन गरी क्याम्पस प्रवेशमा समेत रोक लगाइएको छ ।” साथै सूचनामा क्याम्पसका सबै विद्यार्थीलाई भर्ना तथा परीक्षा फारमसम्बन्धी काम आफूले नै बैंक तथा लेखा शाखाबाट गराउन पनि आग्रह गरिएको छ । अन्य व्यक्तिमार्फत कार्य गराएमा त्यसको जिम्मेवारी क्याम्पस प्रशासनले नलिने समेत उनले स्पष्ट पारेका छन् ।

क्याम्पसबाट निलम्बनको खबर सेलाउन नपाउँदै उनी आबद्ध विद्यार्थी संगठन अनेरास्ववियु रुपन्देही जिल्ला कमिटीले उनलाई निलम्बन गरेको छ । उनी नेकपा एमाले निकट विद्यार्थी संगठन अनेरास्ववियुका जिल्ला कमिटी सदस्य थिए । संगठनका विरोधी गतिविधिमा संलग्न भएको आरोपसहित कुँवरलाई साधारण सदस्यबाट समेत निलम्बन गरिएको अनेरास्ववियुका जिल्ला अध्यक्ष भरत अर्यालद्वारा जारी विज्ञप्तिमा उल्लेख छ । विज्ञप्तिमा भनिएको छ, “संगठनको हित विपरित गतिविधि गरेका कारण कुँवरलाई विधान बमोजिम जिल्ला कमिटी सदस्यसहित साधारण सदस्यबाट समेत निलम्बन गरिएको छ।”