नेपाल बन्दको देशैभरी प्रभाव, काठमाडौंमा ५ बन्दकर्ता पक्राउ

सेतोमसी
कार्तिक ३०, २०७८ मंगलवार

नेपाल बन्दको देशैभरी प्रभाव, काठमाडौंमा ५ बन्दकर्ता पक्राउ

अ +
अ
अ -

काठमाडौं । मूल्यवृद्धिको विरोधमा नेत्रविक्रम चन्द ‘विप्लव’ नेतृत्वको नेकपा माओवादीले गरेको नेपाल बन्दको काठमाडौं लगायत देशैभरी प्रभाव परेको छ ।

सार्वजनिक सवारी साधनहरू कमै मात्र चलेका छन् । सार्वजनिक गाडीहरू कममात्र चल्दा काम विशेषले आज बिहानै गन्तव्यमा जान चाहनेहरुले भने सास्ती पाएका छन् ।

विशेष गरी लामो यात्रा गरेर बिहानै काठमाडौं उपत्यकामा भित्रिएका यात्रुहरू सार्वजनिक गाडी नपाउँदा अलपत्र परेका छन् । कलंकी, नयाँबसपार्क, कोटेश्वर, बल्खु, बालाजुलगायतका स्थानमा यात्रुहरू गाडी कुरिरहेका देखिन्छन् ।

काठमाडौं उपत्यकाबाट बाहिरिने गाडीहरू पनि निकै कम छन् । काठमाडौं उपत्यकाभित्र निजी कार र मोटरसाइकलहरू भने चलिरहेका छन् । तर ती पनि अघिल्ला दिनको तुलनामा कमैमात्र चलेका छन् ।

काठमाडौं उपत्यकाका चोकचोकमा सुरक्षाकर्मीहरूको तैनाथी बढाइएको छ । बन्दको क्रममा कुनै अप्रिय घटना नभएको काठमाडौंले जनाएको छ ।

प्रहरीका अनुसार महाराजगञ्जबाट तीन जना र साँखुबाट दुई जना गरी पाँच जना बन्दकर्ता पक्राउ परेका छन् ।

बन्दमा बुटवल पनि सुनसान देखिएको छ । बिहानैदेखी कुनैपनी सवारी चलेका छैनन् भने पसलहरू पनि बन्द रहेका छन् ।

बिरगंजका सम्पूर्ण बिधालयहरु बन्द रहेको तथा सडकमा गाडिहरु न्युन रुपमा चलेको सेतोमसी संवाददाता सुरज श्रेष्ठले बताएका छन् ।

गुल्मीमा पनि बन्दको प्रभाव परेको छ । सेतोमसी संवाददाता अनिष पन्थीका अनुसार बिहानी शत्रका विद्यालय र पसलहरू बन्द छन् । अहिलेसम्म कुनै अप्रिय घटना नभए समाचारमा जनाईएको छ ।