देवदह । दोस्रो जिल्ला स्तरीय स्वर्गीय निशा स्मृति रोट्रयाक्ट हाजिरीजवाफ प्रतियोगितामा न्यू होराइजन ‘बी’ ले प्रथम स्थान हासिल गरेको छ । 

रोट्रयाक्ट क्लब अफ तिलोत्तमा देवदहको आयोजनामा देवदह इङ्लिस बोर्डिङ हाई स्कूलमा सम्पन्न प्रतियोगितामा सेभेन स्टार इङ्लिस बोर्डिङ द्धितिय र न्यू होराइजन ‘ए’ ले तृतिय स्थान हासिल गरेका छन् । 

प्रतियोगितामा प्रथम, द्धितिय र तृतिय स्थान हासिल गर्ने विद्यालयले क्रमश १५ हजार, १० हजार र ५ हजार रुपैंया सहित शिल्ड र प्रमाणपत्र प्राप्त गरेका छन् । प्रतियोगितामा पहिलो चरणमा २३ वटा विद्यालयका ६९ जना विद्यार्थीले सहभागिता जनाएका थिए । पहिलो लिखित चरण पार गर्दै दोस्रो चरणमा ८ वटा विद्यालय छनौट भएको क्लवका उपाध्यक्ष एवम् कार्यक्रम संयोजक प्रविण गौंडेलले जानकारी दिए । 

हाजिरीजवाफमा समसामयिक, राजनीतिक, राष्ट्रिय, अन्तरास्ट्रिय, सूचना प्रविधी, भुगोल साहित्य, धर्म सँस्कृति लगायत क्षेत्रलाई समेटेर प्रश्न सोधिएको थियो । प्रतियोगितामा गाउँखाने कथा, रेपिड राउण्ड र रोटरी, रोट्रयाक्ट सम्बन्धी प्रश्नहरु पनि समावेश थिए । 

रुपन्देहीका विद्यालय बिच सद्भाव, सामिप्यता र आत्मियता कायम गर्दै विद्यार्थीहरुमा रहेको अन्तरनिहित बौद्धिक क्षमता अभिबृद्धि गर्ने उद्देश्यले कार्यक्रम गरिएको क्लवका अध्यक्ष डा. बिजय अंगाइले जानकारी दिए । 

कार्यक्रममा बोल्दै रोट्रयाक्ट डिस्ट्रिक ३२९२ नेपाल भुटानका इलेक्ट प्रेसिडेन्ट प्रकाश शर्माले अतिरिक्त क्रियाकलापले शिक्षण सिकाईलाई प्रभावकारी बनाउने बताए ।

गतवर्ष समेत उत्साहजनक रुपमा सम्पन्न भएको यो प्रतियोगितालाई क्लवले सिग्नेचर कार्यक्रमको रुपमा अघि बढाइरहेको छ ।

क्लवकी सक्रिय सदस्य निशा चापागाईंको २०७५ असार २३ गते मोटरसाइकल दुर्घटनामा निधन भएको थियो । निशाको स्मरणमा क्लवले निशा स्मृति कोष स्थापना गरेर गतवर्षबाट नियमित रुपमा प्रतियोगिता गर्दै आएको छ । 

क्लवका पूर्व अध्यक्ष कमल थापाको स्वागत र सचिव किसान थापाको सञ्चालनमा भएको प्रतियोगितामा हाजिरीजवाफ सेसनको सञ्चाल क्लवका पूर्व अध्यक्ष सुनिल गिरीले गरेका थिए ।