मगर समुदायका विद्यार्थीलाई अभिमुखिकरण तथा सम्मान

सेतोमसी
श्रावण १७, २०८३ आइतवार

मगर समुदायका विद्यार्थीलाई अभिमुखिकरण तथा सम्मान

अ +
अ
अ -

देवदह । नेपाल मगर संघ देवदहले एसईई उत्तीर्ण मगर समुदायका विद्यार्थीहरूलाई सम्मान गरेको छ । आइतबार आयोजित कार्यक्रममा करिब १ सय विद्यार्थीलाई सम्मान तथा अभिमुखीकरण गरिएको संघले जनाएको छ ।

कार्यक्रमको उद्घाटन समारोहमा वक्ताहरूले शिक्षाविना कुनै पनि समाजको विकास सम्भव नहुने भन्दै शिक्षालाई उच्च प्राथमिकता दिनुपर्नेमा जोड दिएका थिए । उनीहरूले मगर समाजभित्र रहेका भाषा, संस्कार र संस्कृतिलाई नयाँ पुस्तासम्म हस्तान्तरण गर्न आवश्यक रहेको बताए । विद्यार्थी जीवनले नै भविष्यको दिशा तय गर्ने भएकाले सफलता प्राप्त गर्न मेहनती, लगनशील र अनुशासित हुन उनीहरूले आग्रह गरे ।

कार्यक्रममा नेपाल मगर संघ रुपन्देहीका अध्यक्ष थर्कबहादुर बारघरे, देवदह नगरपालिका–२ का वडाध्यक्ष दलबहादुर राकासकोटी, संघका पूर्व अध्यक्ष मनबहादुर रानालगायतले आ–आफ्ना धारणा राखेका थिए ।

अभिमुखीकरण सत्रमा संघका केन्द्रीय लेखा सदस्य जसबहादुर पुनले मगर भेषभूषा, संस्कार, संस्कृति तथा पहिचान, संघका पूर्व केन्द्रीय सहअध्यक्ष दलबहादुर विरकट्टाले मगर समुदायको इतिहास तथा नेपाल मगर संघको स्थापना, सञ्चारकर्मी यम रानाले मगर समुदायको राजनीतिक सहभागिता र उद्यमशीलता तथा विनोद थापाले मगर समुदायमा शिक्षाको महत्व विषयमा सहजीकरण गरेका थिए ।

कार्यक्रम संघका नगर अध्यक्ष किसनबहादुर थापाको अध्यक्षता, उपाध्यक्ष मिलन मास्की रानाको स्वागत तथा सचिव चोलीमाया रानाको सञ्चालनमा सम्पन्न भएको थियो ।