आन्दोलनको क्षतिपूर्ति गर्न दशै बिदामा देवदहका विद्यालय खुल्ने

राहुल देव सापकोटा
आश्विन ११, २०८० बिहिवार

आन्दोलनको क्षतिपूर्ति गर्न दशै बिदामा देवदहका विद्यालय खुल्ने

अ +
अ
अ -

राहुल देव सापकोटा, देवदह । केही समय अघि शिक्षा विधेयक सच्चाइनुपर्ने माग गर्दै नेपाल शिक्षक महासंघको आह्वानमा काठमाडौको माइतिघर मण्डलामा शिक्षकहरुको बृहत आन्दोलन भयो । जसबाट शिक्षक र सरकारबिच सहमति भए पश्चात् आन्दोलन स्थगित भयो । विद्यालयहरुमा पुनः पठनपाठन सुरु भयो ।

सो आन्दोलनका क्रममा असोज ४ र ५ गते विद्यालय बन्द भएका कारण विद्यार्थीको पठन पाठनमा प्रत्यक्ष असर परेको भन्दै शिक्षकहरुको चर्को आलोचना भयो । चर्को विरोधपछि शिक्षकहरूले विदाको दिन कक्षा संचालन गरेर क्रेडिड आवर पुरा गर्ने प्रतिबद्धता जनाएका थिए ।

शिक्षकहरू नियमित पठनपाठनमा फर्किसकेपछि आन्दोलनको क्रममा गरिएको प्रतिबद्धताबारे सेतोमसीले राखेको जिज्ञासामा देवदह नगर शिक्षा समितिका सदस्य एवम महामाया भवानी माविका प्रधानाध्यापक रिषेश्वर अर्यालले आफुहरुले शिक्षकको हकहितका लागि आन्दोलन गरेको र सो आन्दोलनले असोज ४ र ५ गते विद्यालय बन्द भएकोमा सोको क्षतिपूर्ति बापत नगरपालिकाले दिएको विदाको दिन कक्षा संचालन गर्ने बताए ।

थप प्रष्ट हुन हामीले नेपाल शिक्षक महासंघ देवदहका अध्यक्ष निर्मल ढुङ्गानासंग सोध्यौँ । उनले शिक्षण पेशा मर्यादित र जिम्मेवारी पुर्ण पेशा रहेको र सो आन्दोलनका कारण विद्यार्थीको पठनपाठनमा कुनै पनि असर पर्न नदिने बताउँदै देवदह नगरपालिकाले असोज २८ गतेबाट दिएको दशैं बिदालाइ समेत समाबेश गरेर असोज २८, २९, ३० गते विद्यालय संचालन गरिने बताए ।