राजनीति

रास्वपाको महाधिवेशनमा २५ सय प्रतिनिधि सहभागी हुने

सेतोमसी
बैशाख ३०, २०८३ बुधवार

रास्वपाको महाधिवेशनमा २५ सय प्रतिनिधि सहभागी हुने

अ +
अ
अ -

काठमाडौं । राष्ट्रिय स्वतन्त्र पार्टी (रास्वपा) को महाधिवेशनमा २५ सय प्रतिनिधि सहभागी हुने भएका छन् ।

चितवनमा आगामी असार ७, ८ र ९ गतेसम्म हुने पहिलो महाधिवेशनमा ७७ वटै जिल्लाबाट २५ सय प्रतिनिधि सहभागी हुने केन्द्रीय समितिको बैठकले तय गरेको रास्वपाका नेता प्रकाशचन्द्र परियारले जानकारी दिएका छन् ।

त्यस्तै बैठकले सहमहामन्त्री विपिन आचार्यको संयोजकत्वमा विधान संशोधन समिति गठन गरेको छ ।

बैठकले वर्तमान केन्द्रीय समितिलाई महाधिवेशन आयोजक समितिमा रुपान्तरण गरेको छ । बैठकले ७७ वटै जिल्लामा समन्वयका लागि प्रतिनिधि तोकिएको छ । यस्तै जेठ २६ गते बागमतीको प्रदेश अधिवेशन, जेठ २७ गते कोशी, २८ गते मधेस, २९ गते गण्डकी प्रदेश ३० गते लुम्बिनी प्रदेश, ३१ गते कर्णाली प्रदेश र असार १ गते सुदूरपश्चिम प्रदेशको अधिवेशन गर्ने निर्णय बैठकले गरेको छ । रास्वपाको जिल्ला अधिवेशन यसअघि नै भइसकेको छ ।

त्यस्तै बैठकले सभापतिको उम्मेदवार बन्न ५१ हजार दस्तुर तोकेको छ भने पदाधिकारीलाई ४१ हजार र केन्द्रीय सदस्यलाई २१ हजार उम्मेदवारी शुल्क तोकेको छ ।

राष्ट्रिय स्वतन्त्र पार्टी २०७९ सालको असार ७ गते घोषणा भएको थियो । निर्वाचन आयोगमा भने असार १७ गते दर्ता भएको थियो । स्थापनाकालदेखि रवि लामिछाने रास्वपाको सभापतिमा रहेका छन् । हाल बालेन्द्र शाह वरिष्ठ नेता, डा.स्वर्णिम वाग्ले उपसभापति, कविन्द्र बुर्लाकोटी महामन्त्री, भूपदेव शाह महामन्त्री, विपिनकुमार आचार्य सहमहामन्त्री, लिमा अधिकारी कोषाध्यक्ष, वसुमाया तामाङ्ग सहकोषाध्यक्ष रहेका छन् ।