समाजवादी मोर्चाले बुटवलमा सन्देशसभा गर्ने

सेतोमसी
भाद्र १०, २०८० आइतवार

समाजवादी मोर्चाले बुटवलमा सन्देशसभा गर्ने

अ +
अ
अ -

बुटवल । समाजवादी मोर्चाले आगामी भाद्र १२ गते बुटवलमा मोर्चाको प्रदेश समिति घोषणासहित सन्देशसभा गर्ने भएको छ । आइतबार बुटवलमा पत्रकार भेटघाट गर्दै मोर्चाले बुटवलमा सन्देश सभा गर्ने र सभालाई प्रधानमन्त्री पुष्पकमल दाहल प्रचण्डले सम्बोधन गर्ने बताए।

मोर्चामा आवद्ध दलहरु नेकपा माओवादी केन्द्र, नेकपा एकीकृत समाजवादी, नेपाल कम्युनिष्ट पार्टी र जनता समाजवादी पार्टी नेपालका नेता सम्मिलित पत्रकार सम्मेलनमा बोल्दै नेकपा माओवादीका केन्द्रिय सचिव हितमान शाक्यले प्राप्त उपलब्धिको रक्षा गर्न मोर्चा आवश्यक रहेको र मोर्चागत एकता पार्टी एकतासम्म पुर्याउने गरि तयारी भैरहेको बताए।

देशको मुख्य समस्या नै भ्रष्टाचार भएको उल्लेख गर्दै नेता शाक्यले हालको सरकारले भ्रष्टचार नियन्त्रणमा महत्वपुर्ण काम गरिरहेको हुनाले आवस्यक सहयोग र खबरदारी संगसंगै हुने धारणा व्यक्त गरे।

पत्रकारसंग कुराकानी गर्दै मोर्चाका अर्का नेता नेत्रविक्रम चन्द नेकपा निकट नेकपाका पोलिटब्युरो सदस्य बसन्त सीले प्राप्त उपलब्धिको रक्षा गर्दै थप उपलब्धि हासिल गर्ने र समाजवादको दिशामा अगाडी बढ्ने विषय नै समाजवादी मोर्चाको मुख्य कार्यदिशा रहेको बताए।

मोर्चाले बुटवलको अन्तराष्ट्रिय सम्मेलन केन्द्रमा गर्ने सन्देश सभालाई दिनको एक बजे प्रधानमन्त्री प्रचण्डले सम्बोधन गर्ने मोर्चाले जनाएको छ।