कविता : नामले हुने हो भने …

नामले हुने भए धनबहादुर
त धनको भारी बोकेर हिड्थ्यो ।
झुत्रो लुगामा जाडो काटेर हैन
आधुनिक घर र कोठामा सुत्थ्यो ।।

जितबहादुरको हुने भए नाममै जित
उसले कहिल्यै हार्न पर्ने थिएन ।
चुनावमा उठेर धरौटी जफत
कैयौ समय भूमिगत हुनु पर्ने थिएन ।।

कालिका कहिल्यै गोरी हुने थिइन
गोरी कहिल्यै काली हुने थिइन ।
नामले नै हुने भए
फुलमाया कहिल्यै तिरस्कृत हुने थिईन ।।

बुद्धि नाम हुने भए बुद्धिले भरिएको
गल्ती उसको कहिल्यै हुने थिएन ।
गाउको त्यो चिन्तालाल
सफल हुदा पनि खुसि देखिने थिएन ।।

त्यसैले सबैले सुन्नुहोस एउटा कुरा

न समाजवाद भन्ने समाजवादी छन्
न कम्युनिस्ट भन्ने कम्युनिस्ट
न माओवादी भन्ने माओवादी नै छन्
सुसाशनका कुरा गर्ने सबै छन् भ्रष्ट ।।

नामैमा शक्ति, नामैमा गौरव हुने भए
यो देश हुन्थ्यो होला कस्तो ।
प्रकृतिमा संसारकै सुन्दर छ
नेता र नाममा पछि लाग्दा भयो आज यस्तो ।।

नामको पछि हैन अब
व्यवहार र कामको लागौ पछि ।
धुर्वीकृत र एकताबद्ध बनौ सबै
विश्वास गरेर बढौ अघि ।।
विश्वास गरेर बढौ अघि ।।।।

# कविता

गुरु–वन्दना

ताजा अपडेट