एमाले महाधिवेशन

भीम रावलको टिप्पणी : एमालेमा मैले उठाएको विषय सहि प्रमाणित भयो, प्रतिनिधिहरूले अवसरको उपयोग गरुन

सेतोमसी
पौष १, २०८२ मंगलवार

भीम रावलको टिप्पणी : एमालेमा मैले उठाएको विषय सहि प्रमाणित भयो, प्रतिनिधिहरूले अवसरको उपयोग गरुन

अ +
अ
अ -

काठमाडौँ । नेपाली कम्युनिष्ट पार्टीका नेता भिम रावलले नेकपा एमालेको महाधिवेशन बारे टिप्पणी गर्दै पार्टीलाई आफुले शुरु गरेको बाटोमा हिँडाउने अवसर एघारौं महाधिवेशनका प्रतिनिधिहरूको सामु आएको बताएका छन् ।

सामाजिक सञ्जालमा टिप्पणी गर्दै नेता रावलले एमालेको दशौँ महाधिवेशनमा आफुले विधि, पद्धति, स्वच्छ निर्वाचन, सिद्धान्त र राष्ट्रियताको कुरा गरी अध्यक्ष पदमा दिएको उम्मेदवारी कति उचित थियो भन्ने अहिले सबैलाई स्पष्ट भएको विश्वास व्यक्त गरेका छन् ।

उनले भनेका छन् :

एमालेमा रहँदा दशौँ महाधिवेशनमा मैले विधि, पद्धति, स्वच्छ निर्वाचन, सिद्धान्त र राष्ट्रियताको पक्षमा अडेर अध्यक्ष पदमा उम्मेदवारी दिँदा कतिपयले केपी ओलीसँगको व्यक्तिगत इबी र विरोधको रुपमा चित्रित गर्ने चेष्टा गरेका थिए। मेरो उद्देश्य पार्टीलाई विधि,पद्धति अनुरूप देशको सर्वोपररी हितको दिशामा अगाडि बढाउने र महाधिवेशनमा निर्वाचन स्वच्छ वातावरणमा भई प्रतिनिधिहरूले चुन्ने र चुनिन पाउने अधिकारको निर्वाध उपयोग गर्ने स्थिति बनोस् भन्ने थियो । तर ओलीबाट त्यो प्रक्रिया अवरुद्ध पारियो । अहिले घटनाक्रमबाट त्यसबेला मैले उठाएको कुरा कति सही रहेछ भन्ने स्पष्ट भएको छ । अहिले धेरैले केपीको निरंकुश, स्वेच्छाचारी प्रवृत्ति र व्यवहारलाई स्वयं भोगेका र देखेका छन्। अतः एमालेको एघारौं महाधिवेशन त्यस्तो प्रवृत्ति र व्यवहारबाट पार्टीलाई मुक्त गर्दै स्वयं पार्टी, देश र जनताको हितमा संगठनलाई उपयोगी बनाउने अवसरको रुपमा प्रतिनिधिहरुले उपयोग गर्न सके भने उचित हुनेछ ।