देवदह । अन्तर्राष्ट्रिय मित्रता दिवसको अवसरमा देवदह नगरपालिका–५ मा टोलस्तरीय खुला महिला साइकल रेस प्रतियोगिता सम्पन्न भएको छ । प्रतियोगितामा वडाका २१ वटै टोलका ६३ जना प्रतियोगी सहभागी भएको वडा स्तरीय खेलकुद समिति संयोजक नविन लुइटेलले जानकारी दिए । 

दुई उमेर समूहमा भएको प्रतियोगितामा १५ देखि २५ वर्ष उमेर समूहतर्फ संगम पाल्पाली टोलकी स्नेहा सुनार प्रथम, मितेरी गाउँ टोलकी लिजा कँडेल दोस्रो र आदर्श टोलकी श्रेया थापा तेस्रो भएको वडा खेलकुद समितिका सचिव निश्चल अर्यालले बताए । प्रतियोगितामा विजेताहरूलाई पुरस्कार स्वरूप साइकल र नगद पुरस्कार प्रदान गरिएको छ भने सहभागी सबैलाई सहभागीताको प्रमाण पत्र प्रदान गरिएको छ । 

त्यसैगरी २५ वर्ष देखि माथिको उमेर समूहतर्फका विजेतालाई वडा र टोल विकास संस्थाको संयुक्त बैठकपछि पुरस्कार वितरण गरिने जनाइएको छ । 

यसैबीच प्रतियोगितामा सहभागी ६१ वर्षिय विष्णु माया अर्याललाई विशेष सम्मान गर्दै वडा कार्यालयले साइकल उपलब्ध गराउने प्रतिबद्धता जनाइएको छ । 

प्रतियोगिताको उद्घाटन र पुरस्कार वितरणमा देवदह नगर उपप्रमुख विद्यालक्ष्मी गुरुङ, वडा अध्यक्ष तथा नगर प्रवक्ता गणेश डुम्रे, वडा नं ९ का वा अध्यक्ष मोहन जिसी, केरवानी माध्यमिक विद्यालयका प्रधानाध्यापक निर्मल ढुंगाना, देवदह प्रेस क्लबका अध्यक्ष विष्णु प्रसाद पोखरेल, देवदह साइकल राइडर्स क्लबका उपाध्यक्ष हरी भण्डारी लगायतको उपस्थिति रहेको थियो । 

कार्यक्रममा बोल्दै नगर उपप्रमुख गुरुङले मानविय र वातावरणिय स्वास्थ्यको लागि साइकल यात्रा महत्वपुर्ण हुने बताइन् । मान्छे सुविधामुखी बन्दै गएको अवस्थामा साइकल प्रयोगको महत्व र आवश्यकताबारे सचेतना प्रवाह गर्ने कार्यमा समेत कार्यक्रम उपलब्धिमूलक हुने उनको भनाइ छ ।  

देवदह नगरपालिका–५ का वडा अध्यक्ष डुम्रेले महिला सशक्तीकरण, स्वस्थ तथा सक्रिय जीवनशैलीको प्रवर्द्धन र देवदह क्षेत्रको आन्तरिक पर्यटनलाई टेवा पुर्‍याउने लक्ष्यसहित प्रतियोगिता आयोजना गरिएको बताए ।

प्रतियोगिताको औपचारिक कार्यक्रममा वडा स्तरीय खेलकुद समिति संयोजक नविन लुइटेलको अध्यक्षता तथा समिति सदस्य बबिता भट्टराईको संचालन रहेको थियो ।