कविता: लाग्छ ! देशलाई नै सहिद बनाउँछ

नारायण कोइराला
माघ १६, २०७९ सोमवार

अ +
अ
अ -

मेरो लागि गोली खाने सहिदको कुनै महत्त्व नहुँदा
आज सहिद दिवस भनेर हल्ला खल्ला नसुन्दा
नेताको लागि लाखौं सडकमा उत्रिएको देख्दा
सहिदको सालिक अगाडि सुन्यता छाएको देख्दा

लाग्छ म यही सहिद जन्मेको देशको नागरिक हुँ र?
जसले आफू मरेर भएपनि देश र प्रजातन्त्र बचाउँछ
आज त्यही सहिदको बलिदान कुच्दै अर्कैले देश चलाउँछ
जहाँ भोक,रोग र शोकले सहिदको परिवार गलाउँछ

सहिदलाई वर्षको एकपल्ट फूलमाला चढाउँछ
तिनै सहिदका परिवारलाई खाडी र मलेसिया पठाउँछ
फेरि तिनैलाई परदेशमा सहिद बनाएर शासन चलाउँछ
अनि उल्टै सहिदको महिमा गाउँदै संसद भवनमा कराउँछ

न त्यो आवाज खाडी मलेसियामा जहाज चडेर पुग्दछ
न नेपालमा मै गिट्टी कुट्ने सहिदको परिवारले सुन्दछ
मात्र मुठीभर शासकले यो देश बाँडीचुँडी चलाउँछ
लाग्छ एकदिन शासकले देशलाई नै सहिद बनाउँछ।
नारायण कोइराला
तानसेन,पाल्पा