देवदह । देवदह नगरपालिका वडा नम्बर ८ मा अवस्थित जनता  माध्यमिक विद्यालयले विद्यालय शिक्षा परिक्षा (एसइई) उत्तीर्ण हुने विद्यार्थीलाई सम्मान गरेको छ। आइतबार विद्यालयमा एक औपचारिक कार्यक्रमको आयोजना गरि उत्तीर्ण विद्यार्थी सहित अभिभावक र शिक्षकलाई सम्मान गरिएको हो ।  

कार्यक्रममा प्रमुख अतिथिको रूपमा सहभागी देवदह नगरपालिका वडा नम्बर ८ का अध्यक्ष हरि प्रसाद पाण्डेले उत्तीर्ण विद्यार्थी, सफल शिक्षक र अभिभावक तथा विद्यालय व्यवस्थापन र प्रशासनलाई बधाई  ज्ञापन गरे।  "यो प्रतिस्पर्धाको जमाना हो, उच्च प्रतिस्पर्धाको बाबजुत पनि राम्रो नम्बर ल्याएर पास गर्नु भएकोमा बधाई तथा शुभकामना"  उनले भने ।  आगामी दिनमा पनि यसै गरि सफल हुन र आफ्नो अभिभावकहरुको सपना साकार पार्न उनले विद्यार्थीलाई आग्रह गरे  ।

कार्यक्रममा बोल्दै विद्यालयका प्रधानाध्यापक कृष्ण प्रसाद अर्यालले विद्यालयमा शैक्षिक गुणस्तर वृद्धि गर्न विद्यालय व्यवस्थापन र विद्यालय प्रशासनले अथक मेहनत गरिरहेको र शिक्षक, अभिभावक र विद्यार्थीको समेत साथ प्राप्त भएको भन्दै खुसि व्यक्त गरे।    

जनता माविले २०७९ मा लिईएको एसइई परिक्षामा ३२ जना विद्यार्थी सहभागी गराएको जसमा ३० जना विद्यार्थी उत्कृष्ट अंक सहित उत्तीर्ण भएको र २ विद्यार्थीले ग्रेड वृद्धि परिक्षा दिनुपर्ने विद्यालयले जनाएको छ ।

कार्यक्रम विद्यालय व्यवस्थापन समितिका अध्यक्ष खेम प्रासद पाण्डेको अध्यक्षता र शिक्षक विमला अर्यालको संचालनमा  सम्पन्न भएको थियो । कार्यक्रममा महामाया भवानी माविका प्रधानाध्यापक ऋषेश्वर अर्याल, देवदह माविका शिक्षक इन्दिरा अर्याल, विद्यालयका शिक्षक राजेश काफ्ले लगायतले शुभकामना मन्तब्य राखेका थिए । 

सो अवसरमा विद्यालयका संस्थापक अध्यक्ष एक नारायण पौडेलले विद्यालयलाई ५० हजार १५० प्रदान गरेका थिए ।  उनलाई टीका, खादा र प्रमाण पत्र सहित सम्मान गरिएको थियो ।